जळगाव : प्रतिनिधी
पती-पत्नीच्या वादाचा गैरफायदा घेत विवाहितेला लग्नाचे आमिष दाखवून तिच्यावर तरुणाने अत्याचार केला. यातून सदर विवाहिता गर्भवती राहिली असून तरुणाने ऐनवेळी लग्नास नकार दिला. हा प्रकार सन २०१८ ते ३० सप्टेंबर २०२४ दरम्यान घडला. याप्रकरणी तुषार राजेंद्र आहिरे (२८, गोपाळपुरा) याच्याविरुद्ध ३ ऑक्टोबर रोजी शनिपेठ पोलिस ठाण्यात गुन्हा दाखल करण्यात आला असून त्याला अटक करण्यात आली आहे.
सविस्तर वृत्त असे कि, शनिपेठ पोलिस ठाण्याच्या हद्दीतील एका परिसरात बाहेर गावाहून जळगावात आलेली एक २६ वर्षीय विवाहिता पतीसह राहते. सदर विवाहिता व तिचा पती यांचे नेहमी भांडण होत असल्याचा गैरफायदा घेत विवाहितेच्या ओळखीचा तुषार आहिरे याने ‘पतीला घटस्फोट दे, मी तुझ्याशी लग्न करेल’ असे सांगून तिचा विश्वास संपादन केला. त्यानंतर तिच्यावर वेळोवेळी अत्याचार केला. या अत्याचारातून विवाहिता गर्भवती राहिली. विवाहितेने लग्नाचा आग्रह केल्यानंतर तरुणाने नकार दिला. याप्रकरणी विवाहितेने शनिपेठ पोलिस ठाण्यात फिर्याद दिली. त्यावरून तुषारविरुद्ध गुन्हा दाखल झाला आहे
