जळगाव : प्रतिनिधी
दुचाकीच्या नुकसान भरपाईची तयारी असल्याचे दर्शविल्याचा राग आल्याने प्रौढाच्या डोक्यात लाकडी दांडुका टाकून गंभीर जखमी केले. ही घटना शाहूनगरातील मटन मार्केटमध्ये दि. १५ रोजी दुपारच्या सुमारास घडली. याप्रकरणी शाहरुख भिस्ती रा. भिस्ती मोहल्ला याच्याविरुद्ध शहर पोलिसात गुन्हा दाखल करण्यात आला आहे.
मिळालेल्या माहितीनुसार, शहरातील भिस्ती मोहल्ल्यात नासिर शब्बीर भिस्ती (वय ४५) हे वास्तव्यास आहे. त्याच परिसरात राहणारा शाहरुख भिस्ती याच्या दुचाकीचे नासिर यांच्याकडून नुकसान झाले. दरम्यान, शाहरुख भिस्ती याने नासिर यांना शिवीगाळ करीत सांगितले की, तुला माहित आहे का, माझी मोटारसायकल महाग आहे. ती घ्यायची तुझी लायकी आहे का असे म्हणत शिवीगाळ केली. त्यावर शाहरुख भिस्ती याने तुमच्या मोटारसायकलची नुकसान भरपाई करण्याची तयारी असल्याचे सांगितले. त्याचा राग आल्याने शाहरुख याने त्याठिकाणी पडलेला लाकडी दांडा उचलून नासीर भिस्ती याच्या डोक्यात मारुन त्यांना गंभीर जखमी केले. तसेच त्याला जीवंत सोडणार नाही अशी धमकी देवून तो तेथून पळून गेला. दरम्यान, जखमी अवस्थेत नासीर भिस्ती यांनी शहर पोलिसात धाव घेत तक्रार दिली. त्यानुसार संशयित शाहरुख भिस्ती याच्याविरुद्ध गुन्हा दाखल करण्यात आला आहे. पुढील तपास महिला पोहेकॉ अल्का वानखेडे हे करीत आहे.
