अमळनेर : प्रतिनिधी
बाजाराला सोबत नेले नाही, या कारणामुळे पिळोदे (ता. अमळनेर) येथील १४ वर्षीय अल्पवयीन मुलीने गळफास घेऊन आत्महत्या केली. ही घटना घटना गुरुवारी घडली आहे. माया सुधाकर कोळी (वय १४) असे मृत मुलीचे नाव आहे.
मिळालेल्या माहितीनुसार, पिळोदे येथील मालूबाई सुधाकर कोळी बाजार करण्यासाठी अमळनेर जाणार होत्या. त्यावेळी त्यांची मलगी माया ही सोबत येण्यासाठी हट्ट करत होती. मात्र, मालूबाई यांनी तिला नकार दिल्याने माया हिने संतापात घराचा दरवाजा आतून लावून घेतला होता. मालूबाई बाजाराला गेल्यानंतर माया हिने साडीच्या सहाय्याने लाकडी सऱ्याला गळफास घेतला. ग्रामस्थांच्या मदतीने तिला ग्रामीण रुग्णालयात दाखल केले असता डॉक्टरांनी मृत घोषित केले. याप्रकरणी अमळनेर पोलिसांत ‘अकस्मात मृत्यू’ची नोंद करण्यात आली आहे. तपास हे.कॉ. गणेश पाटील करत आहेत.
