भुसावळ : प्रतिनिधी
राज्यातील अनेक ठिकाणी हाणामारी व खुनाच्या घटना घडत असतांना नुकतेच भुसावळ तालुक्यातील ऑर्डनन्स फॅक्टरी वसाहतीमध्ये ४८ वर्षीय सुपरवायझार प्रदीप जयसिंग इंगळे यांचा खून झाल्याची घटना बुधवारी भर दुपारच्या सुमारास घडली. या प्रकरणात दोन जणांवर संशय आहे.
मिळालेल्या माहितीनुसार, येथील आयुध निर्माणी वसाहतीमधील क्वार्टर नंबर ४४ टाईप श्रीमध्ये फॅक्टरी सुपरवायझर प्रदीप इंगळे (मुळगाव मुक्ताईगनगर) हे राहत होते. ते दुपारच्या सुमारास जेवणासाठी घरी आले असता त्यांचा लाकडी बॅट व इतर वस्तूने मारून खून करण्यात आला. या घटनेविषयी पोलिसांना माहिती मिळताच वरणगाव पोलिस स्टेशनचे एपीआय भरत चौधरी, पीएसआय गांगुर्डे, पीएसआय सुशील सोनवणे, पोहेकॉ संदीप बनसोडे, सुखराम सावकारे, होमगार्ड राम चौधरी, महेश चौधरी घटनास्थळी पोहोचले. त्या ठिकाणी सुरक्षा विभाग कर्मचारी व व्यवस्था अधिकारी यांनीही भेटी दिल्या. या घटनेसंदर्भात फॉरेन्सिक लॅबतर्फे तपासणी करण्यात येणार आहे. भुसावळ पोलिस उपविभागीय अधिकारी कृष्णांत पिंगळे यांनी घटनास्थळी भेट दिली व चौकशी केली.
