नवी दिल्ली : वृत्तसंस्था
देशातील जम्मू काश्मीर येथे गेल्या काही महिन्यापासून दहशतवाद्यांकडून हल्ला होत असल्याच्या घटना नियमित घडत आहे. नुकतेच जम्मूच्या राजौरी येथे सोमवारी 22 रोजी सकाळी दहशतवाद्यांनी लष्कराच्या छावणीवर हल्ला केला. यामध्ये एक जवान जखमी झाला. लष्कराच्या अधिकाऱ्याने सांगितले की, दहशतवाद्यांनी राजौरीतील गुंधा येथील 63 आरआर आर्मी कॅम्पवर गोळीबार केला, ज्यावर प्रत्युत्तराची कारवाई करण्यात आली.
यावेळी एका जवानाला गोळी लागली असून त्याला रुग्णालयात दाखल करण्यात आले आहे. घटनेची माहिती मिळताच अधिक सुरक्षा दल घटनास्थळी पाठवण्यात आले. लपलेल्या दहशतवाद्यांचा शोध घेण्यासाठी शोध मोहीम सुरू करण्यात आली आहे.
16 जुलै रोजी जम्मूच्या डोडा जिल्ह्यातील देसामध्ये दहशतवाद्यांनी सुरक्षा दलांवर हल्ला केला होता. शोध मोहिमेदरम्यान दहशतवाद्यांनी केलेल्या गोळीबारात लष्कराच्या कॅप्टनसह ४ जवान शहीद झाले. एका पोलिसाचाही मृत्यू झाला. ८ जुलै रोजी कठुआ जिल्ह्यात झालेल्या दहशतवादी हल्ल्यात एका ज्युनिअर कमिशन्ड ऑफिसर (जेसीओ)सह ५ जवान शहीद झाले होते. 22 एप्रिलपासून जम्मू भागात 10 मोठे दहशतवादी हल्ले झाले आहेत. यामध्ये 12 जवान शहीद झाले आहेत.
