चोपडा : प्रतिनिधी
तालुक्यातील घुमावल येथील भाजपायुमोचे तालुकाध्यक्ष आणि माजी सरपंच प्रकाश लक्ष्मण पाटील (४४) यांनी शुक्रवारी दुपारी ४ वाजेच्या सुमारास मित्रमंडळी, नातेवाईक, आप्तेष्ट यांना ‘जय श्रीराम’चा मेसेज टाकून शनिवारी सकाळी ७ ते दुपारी १२ वाजेदरम्यान गळफास घेतला. त्यांच्या मालकीच्या शेतात झाडाला दोरी बांधून त्यांनी जीवन संपवले. त्यांच्या आत्महत्येचे कारण मात्र समजू शकलेले नाही.
मिळालेल्या माहितीनुसार, शुक्रवारी दुपारी ४ ते ४:३० वाजेदरम्यान त्यांच्या मोबाइलमध्ये नंबर असलेल्या सर्वांना त्यांनी ‘जय श्रीराम’चा मेसेज पाठवला आहे. दि. २० रोजी सकाळी ७ वाजता त्यांच्या दुचाकीवरून त्यांनी मारुती मंदिर परिसरात असलेल्या शेतात झाडाला दोरी बांधून गळफास घेतला. गळफास घेण्याआधी त्यांनी नेहमीप्रमाणे मारुती मंदिरातील देवाचा फोटो मोबाइलमध्ये काढून तोही त्यांनी त्यांच्या स्टेटसला ठेवला होता. सकाळी सात वाजेपासून शेतात गेलेला माणूस घरी परत येत नाही, असे म्हटल्यावर घरच्यांनी शोधाशोध केली. शेतात गेल्यानंतर त्यांच्या दुचाकीची चाबी दुचाकीलाच लावलेली होती. चप्पल दुचाकीजवळच दचाकीजवळच काढली होते. शोधाशोध करताना नाल्यालगत असलेल्या त्यांच्या शेताच्या बांधावरील झाडाला त्यांनी गळफास घेतल्याचे आढळून आले. त्यांच्या पश्चात भाऊ, पत्नी, दोन मुले असा परिवार आहे.
