जळगाव : प्रतिनिधी
खान्देश मिल कॉम्लेक्स येथील आनंद मेळ्यात पैशांची मागणी करत तीन जणांनी आयोजकासह दोघांना बेदम मारहाण केली. एकावर चॉपरसारख्या धारदार शस्त्राने वार करण्यात आले असून, खिशातील १५०० रुपयांची रोकड लांबवली. ही घटना १२ रोजी रात्री घडली.
अरबाज शकील शेख (२६, रा. उस्मानिया पार्क, जळगाव) यांनी खान्देश मिल कॉम्प्लेक्स परिसरात आनंद मेळा आयोजित केला आहे. गुरुवारी रात्री तीन संशयित तरुण अचानक मेळ्याच्या ठिकाणी आले. त्यांनी शेख यांच्यासोबत वाद घालायला सुरुवात केली आणि मेळा भरवल्याच्या मोबदल्यात पैशांची मागणी केली. शेख यांनी पैसे देण्यास नकार दिल्याने त्यांना बेदम मारहाण केली. हल्लेखोरांपैकी एकाने धारदार शस्त्राने अरबाज शेख यांच्यावर वार केले. तसेच खिशातील १५०० रुपयांची रोकड जबरदस्तीने काढून घेतली, विशेष म्हणजे, याचवेळी मेळा पाहण्यासाठी आलेले मोहम्मद अनस खान खलील खान (रा. शाहूनगर) हे मध्यस्थी करण्यासाठी किंवा प्रकार पाहण्यासाठी आले असता संशयितांनी त्यांनाही मारहाण केली. अरबाज शकील शेख यांनी दिलेल्या फिर्यादीवरून शहर पोलिस ठाण्यात तिन्ही संशयितांविरुद्ध गुन्हा दाखल करण्यात आला. पोलिसांनी एका हल्लेखोराला घटनास्थळावर ताब्यात घेतले. मात्र, अंधाराचा फायदा घेऊन त्याचे इतर दोन साथीदार तेथून पळून गेला.
