जळगाव : प्रतिनिधी
लग्नाचा पहिला वाढदिवस आणि तसे मोबाइलमध्ये व्हॉट्सअॅपवर स्टेट्स ठेवून सकाळी आनंदात असलेल्या कुणाल प्रकाश सूर्यवंशी (२९, रा. दातर्ती, ता. साक्री, जि. धुळे ह. मु. स्वामी समर्थ कॉलनी, द्वारका नगर परिसर) या तरुणाने गळफास घेऊन आत्महत्या केली. ही धक्कादायक घटना रविवार, १२ मे रोजी दुपारी साडेबारा वाजता उघडकीस आली आहे. या प्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, कुणाल सूर्यवंशी हा तरुण स्वामी समर्थ कॉलनी येथे आई, वडील, पत्नी आणि तीन महिन्यांच्या मुलीसह राहत होता. तो सिव्हिल इंजिनिअर असून एका सिमेंटच्या कंपनीत तो मार्केटिंग करायचा. १२ मे रोजी त्याच्या लग्नाला एक वर्ष पूर्ण झाले. लग्नाच्या पहिल्या वाढदिवसाचे त्याने मोबाइलमध्ये व्हॉट्सअॅपवर स्टेट्स ठेवले होते. सकाळी कुटुंबीयांसह अनेकांना तो भेटला तेव्हा आनंदी होता. दुपारी त्याने राहत्या घरी झोक्याच्या दोरीलाच गळफास घेतला. पत्नी त्याला बोलवण्यासाठी गेली त्यावेळी तिला पतीने गळफास घेतल्याचे दिसले.
