भुसावळ : प्रतिनिधी
उसनवारीने दिलेल्या पैशांपैकी बाकी राहिलेले पैसे मागितल्याच्या कारणावरून तरुणाच्या डोक्यात लोखंडी पाइपने वार करून जखमी केल्याची घटना ४ मे रोजी रात्री १२.३० वाजता शहरातील जलालशहा बाबा दर्गाजवळ घडली. याप्रकरणी भुसावळ बाजारपेठ पोलिस ठाण्यात सात जणांविरोधात ९ रोजी गुन्हा दाखल करण्यात आला आहे.
सविस्तर वृत्त असे कि, इमरान शेख गुलाम रसूल (वय ३५, रा. जलालशहा बाबा दर्गा, भुसावळ) याने सोमेश सोनवणे याला उसनवारीने ४० हजार रुपये दिले होते. ४ मे रोजी मध्यरात्री इमरान शेख याने ४० हजार पैकी ५ हजार रूपये मागितल्याचा राग आल्याने सोमेश सोनवणे, किशन पंचरवाला, संतोष सोनवणे, कुणाल सोनवणे, प्रताप सुरवाडे, नीलेश पारधे, जितू कैलास करोसिया (सर्व रा. भुसावळ) यांनी शिवीगाळ करत इमरान याला लाथाबुक्क्यांनी मारहाण केली. एकाने लोखंडी पाइपने मारहाण करून जखमी केले. जखमी झालेल्या इमरान याला भुसावळ ट्रामा केअर सेंटर येथे दाखल करण्यात आले. उपचार घेतल्यानंतर इमरान शेख याने भुसावळ बाजारपेठ पोलिस ठाण्यात फिर्याद दिली. त्यानुसार वरील सात जणांविरोधात गुन्हा दाखल करण्यात आला. तपास पोलिस उपनिरीक्षक अमोल दुकळे हे करीत आहेत.
