जळगाव : प्रतिनिधी
शहरातील मेहरूण तलाव शिवारात एका इमारतीच्या ठिकाणी सेंट्रिंग काम करत असताना, अचानक ९ व्या मजल्यावरून तोल जाऊन पडल्याने एका मजुराचा जागीच मृत्यू झाल्याची घटना बुधवारी सकाळी ९:३० वाजता घडली. याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली.
सविस्तर वृत्त असे कि, बंडू वना सोनवणे (वय ५२, रा. आसोदा रोड, गुरुदत्त कॉलनी), असे मयत व्यक्तीचे नाव आहे. ते गेल्या अनेक वर्षांपासून सेंट्रिंगचे काम करत होते. मेहरूण तलाव शिवारात एका इमारतीचे काम सुरू आहे. बुधवारी सकाळी ९.३० वाजता इमारतीच्या नवव्या मजल्यावर बंडू सोनवणे हे सेंट्रिंगचे काम करत होते. हे काम करत असताना अचानक त्यांचा तोल गेला. ते थेट नवव्या मजल्यावरून खाली पडले. याठिकाणी असलेल्या इतर मजूर व नातेवाइकांनी त्यांना जिल्हा शासकीय वैद्यकीय महाविद्यालय व रुग्णालयात दाखल केले असता, त्याठिकाणी डॉक्टरांनी तपासणीअंती त्यांना मयत घोषित केले. सोनवणे यांच्या पश्चात पत्नी, मुलगा व तीन विवाहित मुली आहेत
