जळगाव : प्रतिनिधी
मुलाचा वाढदिवस साजरा केल्यानंतर पित्याने दुसऱ्या दिवशी घरात पंख्याला गळफास घेऊन आत्महत्या केल्याची घटना गुरुवारी दुपारी ३ वाजता शहरातील गणेशनगर भागात घडली. अमित नंदलाल कटारिया (वय ३२, रा. आदर्शनगर, जळगाव) असे मयत तरुणाचे नाव आहे.
सविस्तर वृत्त असे कि, अमित दोन महिन्यांपूर्वीच आदर्शनगरात पत्नी, तीन वर्षांचा मुलगा सन्मित यांच्यासह राहायला आला होता. महात्मा फुले मार्केट येथे ‘चुनरी कलेक्शन’ नावाने त्याचे कपड्याचे दुकान आहे. बुधवारी ३ वर्षीय मुलाचा वाढदिवस साजरा केला. गुरुवारी फुले मार्केटमधील दुकानातून अमित गणेशनगरमधील आपल्या आईच्या घरी गेला. वरच्या मजल्यावर आराम करण्यासाठी जात असल्याचे अमितने आईला सांगितले. बराच वेळ झाल्यानंतर आई अमितला पाहण्यासाठी वरच्या मजल्यावर गेली असता तो पंख्याला गळफास घेतलेल्या अवस्थेत दिसला. आईने आक्रोश केल्यानंतर शेजाऱ्यांच्या मदतीने मृतदेह खाली उतरवून जीएमसीत हलविला. त्या ठिकाणी डॉक्टरांनी अमितला मृत घोषित केले. दरम्यान, गेल्या काही दिवसांपासून अमित मानसिक तणावात असल्याची माहिती नातेवाइकांनी दिली.
