रावेर : प्रतिनिधी
अक्षय्य तृतीयेनिमित्त येथे आईसोबत आलेल्या फेकरी येथील तरुणाचे अपघाती निधन झाले. ही घटना पातोंडी गावाच्या पुढे मुक्ताईनगर रस्त्यावर एका ढाब्यासमोर गुरुवारी सायंकाळी पाच वाजेच्या दरम्यान घटना घडली.
सविस्तर वृत्त असे कि, रावेर तालुक्यातील बक्षीपूर येथील जि. प. प्राथमिक शाळेतील शिक्षक म्हणून सेवारत असलेल्या रामचंद्र मधुकर सोनवणे (रा. रावेर) यांचेकडे त्यांचा भाचा यश दिलीप तायडे (वय २१, रा. फेकरी, ता भुसावळ) हा त्याची आई अलका दिलीप तायडे यांच्यासह मोटारसायकलने अक्षय्य तृतीयेनिमित्त आला होता.
मामांकडे दुपारी सहभोजन घेतल्यानंतर तो सावदा येथील मावशीला भेटून येतो असे सांगत मोटारसायकलने निघाला. मात्र तो नांदूपिंप्री येथील मावशीकडे जायला निघाला. तो पातोंडी गावाच्या पुढे मुक्ताईनगर रोडने जात असताना मुक्ताईनगरकडून भरधाव वेगात येणाऱ्या एका मिनीट्रकने त्याला समोरून जबर धडक देत उडवल्याने यश हा जागीच ठार झाला. याबाबत रावेर पोलिसात गुन्हा दाखल करण्यात आला आहे. पोलिस निरीक्षक डॉ. विशाल जयस्वाल यांच्या मार्गदर्शनाखाली फौजदार प्रिया वसावे पुढील तपास करीत आहे
