जळगाव : प्रतिनिधी
तालुक्यातील किनोद गावात राहणाऱ्या एका बारा वर्षीय मुलीला कूलर सुरू करत असताना विजेचा धक्का लागल्याने जागीच मृत्यू झाल्याची घटना शुक्रवारी दुपारी ४ वाजेच्या सुमारास घडली. याबाबत तालुका पोलिस ठाण्यात अकस्मात मृत्यूची नोंद करण्यात आली आहे. अक्षदा किशोर मोरे (१२) असे मयत मुलीचे नाव आहे.
सविस्तर वृत्त असे कि, अक्षदाचे वडील किशोर मोरे यांचे एक वर्षांपूर्वी दुर्धर आजाराने निधन झाले आहे. तर आई हातमजुरी करून परिवाराचा उदरनिर्वाह चालवते. शुक्रवारी दुपारी ४ वाजेच्या सुमारास अक्षदाने कूलर सुरू करण्यासाठी विजेचे बटन दाबण्याचा प्रयत्न केला. त्यावेळी विजेचा जोरदार धक्का बसल्याने अक्षदा ही जोरात फेकली गेली. कुटुंबीयांच्या लक्षात येताच त्यांनी नागरिकांच्या मदतीने तिला शासकीय वैद्यकीय महाविद्यालय व रुग्णालयात दाखल केले. तिथे वैद्यकीय अधिकारी डॉ. नीलेश पाटील यांनी तिला मयत घोषित केले. यावेळी कुटुंबीयांनी आक्रोश केला. पोलिसांना माहिती मिळताच त्यांनी घटनास्थळी धाव घेतली. तालुका पोलिस स्टेशनला अकस्मात मृत्यूची नोंद केली आहे.
