भुसावळ : प्रतिनिधी
तालुक्यातील सुनसगाव येथून जवळच असलेल्या गोजोरे रस्त्यावर सुदर्शन पेपर मिल फाट्यावर मिनी ट्रक व मोटारसायकल यांचा अपघात होऊन दोन परप्रांतीय जागीच ठार झाल्याची घटना घडली. हा अपघात १० एप्रिल रोजी दुपारी १२ वाजेच्या सुमारास घडला.
सविस्तर वृत्त असे कि, रामसिंग गमरीया भिलाला (४७, रा. कोटबैंडा, जि. खरगोन, मध्य प्रदेश) व मोटला छितरीया भिलाला (४०, रा. मसानिया फाल्या, जि. खरगोन) हे दोघे मोटारसायकलने (एम.पी. १० झेड. बी. ०४०१) ने शेताकडून सुनसगाव गोजोरा रोडवर आल्यावर सुनसगावकडून गोजोराकडे जाणाऱ्या ट्रकने (एम.एच. १५ डी.के. १५६९) जोरदार धडक दिल्याने दोघांचा जागीच मृत्यू झाला. या अपघातात मोटारसायकलचा चक्काचूर झाला. दोन्ही जण रस्त्यावर फेकले गेले. अपघाताची माहिती मिळताच भुसावळ तालुका पोलिस स्टेशनचे पोलिस निरीक्षक बबनराव जगताप व पोउनि पूजा अंधारे, तसेच कुन्हा पानाचे औट पोस्टचे पोलिस कर्मचारी दीपक जाधव, प्रेमचंद सपकाळे, उमेश बारी व चालक सादिक शेख घटनास्थळी दाखल झाले व पंचनामा केला. मिनी ट्रक चालकाला अटक करण्यात आली असल्याचे समजते.
