जळगाव : प्रतिनिधी
नशेतील एका तरुणाने सांगितल्याप्रमाणे पोलिस पथक त्याच्या घरी एमडी ड्रग्ज शोधायला गेले खरे; मात्र त्याच्या घरात प्रतिबंधित गुटखा आढळून आला. शहर पोलिसांनी ७४ हजार १४९ रुपयांचा गुटखा व इतर मुद्देमाल जप्त केला.
मिळालेल्या माहितीनुसार, जळगाव शहरात १ मार्च रोजी पोहेकॉ किशोर निकुंभ व पोकों तेजस मराठे हे पेट्रोलिंग करत असताना शाहूनगर परिसरात अयान हसन भिस्ती (२०, रा. शाहूनगर) हा नशेत असल्याचे आढळून आले. त्याने एमडी ड्रग्जची नशा केली असून, ते घरात ठेवले असल्याचे पोलिसांना सांगितले. पोलिस त्याच्या घरी गेले असता, तेथे त्याचा भाऊ अन्सार हसन भिस्ती (२२) होता. घर झडतीत एमडी ड्रग्ज न सापडता प्रतिबंधित गुटखा मिळाला, गुटख्याच्या या साठ्यासह ३२ हजार २७० रुपये, दोन मोबाइल, असा एकूण ७४ हजार १४९ रुपयांचा मुद्देमाल जप्त करण्यात आला. याप्रकरणी पोकों तेजस मराठे यांनी शहर पोलिस ठाण्यात फिर्याद दिली. त्यावरून अयान भिस्ती व अन्सार भिस्ती या दोघांविरुद्ध गुन्हा दाखल करण्यात येऊन दोघांना अटक करण्यात आले आहे. पुढील तपास सपोनि कल्याणी वर्मा करीत आहेत.
