पुणे : वृत्तसंस्था
राज्यातील अनेक शहरात अल्पवयीन मुलीसह विवाहितेवर अत्याचार व विनयभंगाच्या अनेक घटना घडत असताना अशीच एक धक्कादायक घटना पुणे शहरात घडली आहे. व्यावसायासंदर्भात चर्चा करण्यासाठी तरुणीला घरी बोलावून घेत तिच्यासोबत अश्लील चाळे करुन तिचा विनयभंग केला. याप्रकरणी विश्रांतवाडी पोलिसांनी एका युवकावर विनयभंगाचा गुन्हा दाखल केला आहे. हा प्रकार 12 फेब्रुवारी रोजी रात्री अकराच्या सुमारास धानोरी येथील मुंजाबावस्ती येथे आरोपीच्या घरी घडला आहे.
याबाबत विमाननगर येथे राहणाऱ्या 20 वर्षीय तरुणीने रविवारी (दि.25) विश्रांतवाडी पोलीस ठाण्यात फिर्याद दिली आहे. यावरुन प्रविण चिजवाणी (वय-35 रा. गोल्डकोस्ट सोसायटी, मुंजाबावस्ती, धानोरी) याच्या विरोधात आयपीसी 354 नुसार गुन्हा दाखल केला आहे. पोलिसांनी दिलेल्या माहितीनुसार, आरोपी आणि फिर्यादी एकमेकांच्या ओळखीचे आहेत. आरोपी प्रविण याने पीडित तरुणीला बिझनेस संदर्भात चर्चा करण्यासाठी घरी बोलावून घेतले.
पीडित मुलगी आरोपीच्या घरी चर्चा करण्यासाठी गेली. चर्चा करत असताना आरोपीने तरुणीचा हात पकडून तिच्यासोबत अश्लील चाळे करुन स्त्री मनास लज्जा उत्पन्न होईल असे वर्तन केल्याचे फिर्यादीत नमूद केले आहे. पुढील तपास पोलीस उपनिरीक्षक महेश चव्हाण करीत आहेत.
