जळगाव : प्रतिनिधी
सोशल मीडियावर आक्षेपार्ह पोस्ट व्हायरल केल्याप्रकरणी एका संशयितास जिल्हा पेठ पोलिसांनी ताब्यात घेतले आहे. मात्र या पोस्टमुळे सोमवार, १९ फेब्रुवारी रोजी रात्रीच्या सुमारास शाहूनगर परिसरात तणावाचे वातावरण निर्माण झाले होते. घटनेची माहिती मिळताच पोलिस घटनास्थळी पोहोचले. त्यामुळे परिस्थिती वेळीच नियंत्रणात आली.
घटनेची माहिती मिळाल्यानंतर अप्पर पोलीस अधीक्षक अशोक नखाते, शहर व जिल्हापेठ पोलिस ठाण्याचे निरीक्षक डॉ. विशाल जयस्वाल व अनिल भवारी व त्यांचे सहकारी घटनास्थळी दाखल झाले. नागरिकांना शांततेसह अफवांवर विश्वास न ठेवण्याचे आवाहन केले. याप्रकरणी जिल्हापेठ पोलिसांनी एका संशयिताला ताब्यात घेतले असून त्यांची चौकशी केली. त्याच्याविरुद्ध गुन्हा दाखल करण्याचे काम रात्री उशिरापर्यंत सुरु होते. घटनेची माहिती मिळताच पोलिस अधीक्षक डॉ. महेश्वर रेड्डी, पोलीस उपअधीक्षक संदीप गावित हे जिल्हापेठ पोलिस ठाण्यात पोहोचले. याठिकाणी एका गटाकडून त्यांना निवेदन देवून संशयितावर कठोर कारवाई करण्याची मागणी करण्यात आली
