जळगाव : प्रतिनिधी
तालुक्यातील एका गावातील ३२ वर्षीय विवाहितेच्या पतीने गावात करारवर शेती केलेली होती, फारसे उत्पादन न आल्याने कर्जाचा डोंगर चढला. या विवचतेनून जागृती अरुण कोळी (वय ३२) यांनी विषारी द्रव्य प्राशन केल्याची घटना जळगाव तालुक्यातील डिकसाई येथे घडली असून या महिलेवर उपचार सुरु असतांना त्यांची गुरुवारी प्राणज्योत मालवली. या प्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, जळगाव तालुक्यातील डिकसाई येथे जागृती कोळी आपल्या कुटुंबियांसह वास्तव्यास होत्या. त्यांचे पती अरुण कोळी हे स्वतःजवळील शेतीसोबतच गावातील इतरांची शेती करारवर घेऊन करत होते. मात्र, यंदा पाऊस कमी झाल्यामुळे अरुण कोळी यांना उत्पन्न कमी झाले. त्यात शेतीसाठी कर्ज घेतल्यामुळे आर्थिक अडचणी उभ्या राहिल्या. दि. २५ जानेवारी रोजी जागृती कोळी या घरात आपल्या मुलासोबत असताना, जागृती यांनी विषप्राशन केले. आईला त्रास होत असल्याचे पाहून, लहान मुलगा ‘आईने विष घेतले’ असे म्हणत गल्लीत धावत सुटला. शेजारच्यांना हा प्रकार लक्षात आल्यानंतर तातडीने जागृती कोळी यांना जिल्हा शासकीय वैद्यकीय महाविद्यालय व रुग्णालय येथे उपचारासाठी दाखल करण्यात आले.
