गडहिंग्लज : वृत्तसंस्था
राज्यातील अनेक शहरात अल्पवयीन मुलासह मुली देखील गळफास घेत आत्महत्या होण्याच्या घटना नियमित वाढत असतांना नुकतेच गडहिंग्लज तालुक्यातील भडगाव येथे एका शाळकरी मुलीने राहत्या घरातील छताच्या हुकला दोरीने गळफास घेऊन आत्महत्या केली. तिने डोकेदुखीच्या त्रासाला कंटाळून आत्महत्या केल्याचे समजते. यात १७ वर्षीय श्रावणी प्रकाश गोरुले हिचा दुर्देवी मृत्यू झाला आहे.
मिळालेल्या माहितीनुसार,सरंबळवाडी येथील माध्यमिक शाळेत शिक्षक म्हणून कार्यरत असलेले प्रकाश गोरुले त्यांची मुलगी श्रावणी हीदेखील त्याच शाळेत दहावीच्या वर्गात शिकत होती. २०१९ पासून श्रावणीला डोकेदुखीचा त्रास होता. त्यामुळे तिच्यावर किरकोळ उपचार सुरू होते. १ जानेवारीला सीटीस्कॅन व एमआरआय रिपोर्टनुसार डॉक्टरांनी गोळ्या बदलून दिल्या तरी तिची डोकेदुखी कमी झालेली नव्हती.
मानसोपचारतज्ज्ञाकडूनही उपचार केले; परंतु त्यांच्या औषधोपचारानेही काही फरक न पडल्यामुळे 15 सोमवारी सकाळी वडील शाळेला आणि आई भांडी धुण्याकरिता घराच्या पाठीमागे गेली असताना तिने साडेअकराच्या सुमारास राहत्या घरातील छताच्या हुकला दोरीने गळफास लावून घेतला. आई घरात आल्यानंतर ही घटना उघडकीस आली. आजूबाजूच्या नागरिकांनी तिला तातडीने येथील उपजिल्हा रुग्णालयात आणले. मात्र, उपचारापूर्वीच तिची प्राणज्योत मालवली होती. वडील प्रकाश गोरुले यांच्या फिर्यादीवरून गडहिंग्लज पोलिसात घटनेची नोंद करण्यात आली .
