भुसावळ : प्रतिनिधी
रेल्वेस्थानकाच्या मुख्य प्रवेशद्वारासमोर असलेल्या स्कॅनिंग मशीनमध्ये सामान स्कॅन करण्यास सांगितल्याचा राग आल्याने बिहारच्या प्रवाशाने कर्तव्यावर असलेल्या आरपीएफ कर्मचाऱ्याला शिवीगाळ करून मारहाण केली. ही घटना १३ रोजी रात्री साडेदहाच्या दरम्यान घडली. याप्रकरणी लोहमार्ग पोलिस ठाण्यात राजकुमार प्रसाद खेदू प्रसाद (३५, रा. महनाकुली) याच्याविरुद्ध गुन्हा नोंद करण्यात आला आहे.
मिळालेल्या माहितीनुसार, २४ तास प्रवाशांची वर्दळ असलेल्या भुसावळ रेल्वेस्थानकाच्या मुख्य प्रवेशद्वारा समोर नेहमीप्रमाणे ऑपरेटर म्हणून आरपीएफ हवालदार प्रकाश विठोबा तुरकाने (५८) (रा. आरपीएफ बॅरेक) हे स्कॅनर मशीनवर १३ रोजी कर्तव्यावर असताना आरोपी राजकुमार प्रसाद यास सामान स्कॅन मशीनमध्ये तपासणी करण्याचे सांगितले असता याचा त्याला राग आला व त्याने प्रकाश तुरकाने यांना मारहाण करण्यात सुरुवात केली. या मारहाणीत त्यांच्या ओठाला जखम झाली आहे. मुसाफिर खान्याजवळील प्रवाशांनी मध्यस्थी करून सावरासमोर केली.
