जळगाव : प्रतिनिधी
जळगाव शहरातील रामानंद नगरातील नंदनवन कॉलनी परिसरात आईने मुलीच्या हातून मोबाइल घेत तिला अभ्यास करण्याचे सांगताच संतप्त झालेल्या १२ वर्षीय मुलीने थेट गळफास घेत आत्महत्या केल्याची धक्कादायक घटना शनिवारी रात्री ११ वाजेच्या सुमारास घडली. यात पद्मश्री ऊर्फ परी भरत पाटील या मुलीचा दुर्देवी मृत्यू झाला आहे. याप्रकरणी रामानंदनगर पोलिस ठाण्यात अकस्मात मृत्यूची नोंद झाली आहे.
मिळालेल्या माहितीनुसार, शहरातील रामानंद नगरातील नंदनवन कॉलनीत शिक्षक भरत पाटील हे वास्तव्यास असून त्यांची १२ वर्षांची मुलगी पद्मश्री ही मोबाइल खेळत असताना आईने तिच्याजवळील मोबाइल घेत अभ्यास करण्यास सांगितले. याचा राग आल्याने पद्मश्री हिने दुसऱ्या मजल्यावरील खोलीतील झोक्याच्या कडीला ओढणीच्या साहाय्याने गळफास घेतला.
रागाच्या भरात गेलेली पद्मश्री बराच वेळ झाला तरी खाली न आल्याने कुटुंबीय खोलीकडे गेले. दरवाजा ठोठावूनदेखील मुलगी प्रतिसाद देत नसल्याने त्यांनी दरवाजा तोडला. त्यावेळी मुलगी गळफास घेतलेल्या अवस्थेत बघताच तिच्या कुटुंबीयांना धक्का बसला. कुटुंबीयांनी मुलीला शासकीय वैद्यकीय महाविद्यालय व रुग्णालयात दाखल असता त्याठिकाणी तिला मयत घोषित केले. दरम्यान, पदद्मश्री ही इयत्ता सहावीच्या वर्गात शिक्षण घेत होती. ती अभ्यासातदेखील हुशार होती.
