एरंडोल : प्रतिनिधी
जुन्या धरणगाव रस्त्याकडून आलेली दुचाकीने राष्ट्रीय महामार्ग ओलांडताना पारोळाकडून वेगाने आलेल्या कारने दुचाकीला धडक दिल्याने त्यात दुचाकीचालक महेंद्र गोरख जोगी (३२) हा दुचाकीवरून थोड्या अंतरावर फेकला जाऊन गंभीर जखमी झाला. ही दुर्घटना बुधवारी दुपारी पावणेदोन वाजेच्या सुमारास अमळनेर नाक्यानजीक घडली.
मिळालेल्या माहितीनुसार, एरंडोल तालुक्यातील गणेश नगर येथील रहिवासी महेंद्र जोगी हा दुचाकीला (एमएच-४६/वाय-५७९७) एरंडोल येथे पंपावर जाऊन पेट्रोल भरून घराकडे परतताना अमळनेर नाक्यानजीक महामार्ग ओलांडत असताना कारने (एमएच-०२/सीबी-८८५१) दुचाकीला जोरदार धडक दिली. त्यात दुचाकी चालक जोगी हा खाली फेकला जाऊन गंभीर जखमी झाला. त्याला उचलण्यासाठी भरत महाजन व काशिनाथ महाजन या दोघांनी धाव घेतली. कारमधील पुरुष व महिला एरंडोल पोलिस स्टेशनला वाहनासह दाखल झाले. जखमी जोगी याला जळगाव येथे उपचारार्थ खासगी रुग्णालयात दाखल करण्यात आले.
