जळगाव : प्रतिनिधी
संध्याकाळी कामावरून घरी परतत असताना पाण्याचा अंदाज न आल्याने सोमवारी संध्याकाळी गिरणा नदी पात्रात बुडालेल्या मंगल इघन बाविस्कर (३२, रा. बोरनार, ता. जळगाव) या तरुणाचा बुधवार दि. २० डिसेंबर रोजी संध्याकाळी मृतदेह सापडला. मंगल बाविस्कर हा तरुण मजुरी काम करायचा. सोमवारी सकाळी तो कामावर गेला होता.
सध्या आवर्तन सोडण्यात आल्यामुळे गिरणा नदीला चांगलेच पाणी आलेले आहे. संध्याकाळी मंगल घरी परतत असताना त्याला नदीपात्रात पाण्याचा अंदाज आला नाही व तो पाण्यात बुडाला. ही घटना लक्षात आल्यानंतर गावकऱ्यांनी त्याचा शोध सुरू केला. तसेच काही पट्टीच्या पोहणाऱ्यांनाही बोलविले. अखेर बुधवारी संध्याकाळी पाच वाजता त्याचा मृतदेह सापडला. तो शासकीय वैद्यकीय महाविद्यालय व रुग्णालयात नेण्यात आला. मयताच्या पश्चात आई, वडील, पत्नी, दोन लहान मुले आहेत. तरुणाच्या मृत्यूने दोन्ही चिमुकले पोरकी झाली आहेत.
