भुसावळ : प्रतिनिधी
शहरातील आशा कॉम्प्लेक्सजवळ शाळेतून घरी जात असताना १३ वर्षीय शाळकरी विद्यार्थ्याला ट्रकचा धक्का लागला. त्यात त्या मुलाच्या उजव्या पायावरून ट्रकचे चाक गेले. त्यामुळे तो गंभीर जखमी झाला आहे. ही घटना शुक्रवारी घडली.
मिळालेल्या माहितीनुसार, खडका रोड येथून महामार्गाकडे जाणाऱ्या ट्रक क्रमांक एमएच ०४ बीयू ३५७२ हा आशा कॉम्प्लेक्स येथून जात असताना त्याच वेळेस काशीफ जफर शेख सय १३, रा. मुस्लिम कॉलनी) हा शाळेतून सायकलने घरी जात होता. ट्रकचालक फैजान खान अमन खान (वय २०, रा. वरदी, ता. चिखली, जि. बुलढाणा) याने काशीफला धडक देत त्याच्या उजव्या पायावरून चाक नेले. यामुळे काशीफला गंभीर दुखापत झाली असून, त्यास पुढील उपचारार्थ खाजगी रुग्णालयात दाखल करण्यात आले आहे. या प्रकरणी बाजारपेठ पोलिस ठाण्यामध्ये गुन्हा दाखल झाला असून, तपास पो. कॉ. महेश चौधरी करीत आहेत.
