भुसावळ : प्रतिनिधी
येथील नाहाटा महाविद्यालय चौफुलीजवळ तरुणाला चाकूचा धाक दाखवून त्यांच्याजवळील मोटारसायकल व मोबाइल असा ६८ हजार रुपये किमतीचा मुद्देमाल घेऊन चोरटा पसार झाला. ही घटना रविवारी भरदिवसा घडली. याप्रकरणी बाजारपेठ पोलिसात गुन्हा दाखल केला आहे.
मिळालेल्या माहितीनुसार, चंद्रपूर जिल्ह्यातील पांडवडा विजासन रोड येथील ३० वर्षीय मंगेश भरत बेलखुले हा दिनांक ११ रोजी सकाळी साडेअकरा वाजेच्या सुमारास नाहाटा महाविद्यालयाजवळ उभा होता दरम्यान, चाकूचा धाक दाखवून व मोबाइल हिसकावून चोरट्याने एमएच ३४.बीई ०९४५ या क्रमांकाच्या दुचाकीवरून पळ काढला. याप्रकरणी मंगेश बेलखुडे यांनी दिलेल्या फिर्यादीवरून बाजारपेठ पोलिसात गुन्हा दाखल करण्यात आलेला आहे. पुढील तपास सहायक फौजदार सत्तार एम.शेख करीत आहेत.
