वरणगाव : प्रतिनिधी
नागेश्वर मंदिरात दर्शनासाठी आलेल्या दोन जणांवर बिअरच्या बाटलीने हल्ला करून जखमी करण्यात आले आहे. ही घटना शुक्रवारी सायंकाळी घडली. दिनेश सुरेश कोळी (कठोरा) असे या जखमी इसमाचे नाव आहे. याप्रकरणी वरणगाव पोलिसांत गुन्हा दाखल करण्यात आला आहे. .
याबाबत मिळालेल्या माहितीनुसार, ‘ड्राय डे’ असतानासुद्धा काही अल्पवयीन मुले नागेश्वर मंदिरात बिअर पिऊन धिंगाणा घालत होते. त्यावेळी एकाने दिनेश कोळी (कठोरा) याच्या डोक्यावर बिअरची बाटली फोडली. दिनेश याने या घटनेची माहिती आपला मावसभाऊ सागर रवींद्र कोळी (२२, रा. फुलगाव) यास कळविली. तो तेथे आला असता त्याच्यावरसुद्धा चौघांनी हल्ला चढवून हात फ्रॅक्चर केला. याबाबत वरणगाव पोलिसात गुन्हा दाखल करण्यात आला आहे. पुढील तपास एपीआय आशिष अडसूळ यांचे मार्गदर्शनाखाली सुरू आहे.
