

जळगाव : प्रतिनिधी
सिल्लोड येथून साखरपुड्याचा कार्यक्रम आटोपून दुचाकीने गावाकडे परतणाऱ्या मामा-भाच्याच्या दुचाकीला अज्ञात वाहनाने कट मारल्याने झालेल्या भीषण अपघातात मामाचा जागीच मृत्यू झाला, तर भाचा जखमी झाला. ही दुर्दैवी घटना रविवारी विटनेर (ता. जळगाव) जवळ घडली. दुचाकीवरून खाली पडलेल्या अनिल नागो सपकाळे (वय ४३, रा. दापोरा) यांच्या पायावरून मागून येणारा ट्रक गेल्याने त्यांचा अंत झाला.
अनिल सपकाळे हे १५ नोव्हेंबर रोजी जळगाव तालुक्यातील विटनेर गावाजवळून दापोरा येथे जात असताना हा अपघात झाला. या अपघातात गंभीर जखमी झाल्यामुळे त्यांना उपचारासाठी तत्काळ जीएमसी रुग्णालयात दाखल करण्यात आले होते. दरम्यान, रुग्णालयात पोहोचल्यानंतर वैद्यकीय अधिकाऱ्यांनी तपासणी करून अनिल सपकाळे यांना मृत घोषित केले. दरम्यान या अपघातात मृत अनिल यांचा भाचा जानकीराम किसन सोनवणे हादेखील किरकोळ जखमी झाला आहे. या प्रकरणी एमआयडीसी पोलिस ठाण्यात अकस्मात मृत्यू नोंद करण्यात आली आहे. पुढील तपास सहायक पोलिस निरीक्षक प्रमोद वाघ, तपासणी अंमलदार पोलिस नाईक पंकज पाटील हे करत आहे.



