सातारा : वृत्तसंस्था
न्यायालयीन कोठडी सुनावल्यानंतर संशयित आरोपींना सातारा जिल्हा कारागृहात घेऊन जाणाऱ्या पोलीस व्हॅनला अचानक आग लागल्याची घटना कराड शहरात घडली. शहरातील गजबजलेल्या भेदा चौकात शनिवारी रात्री सुमारे 7 वाजण्याच्या सुमारास ही घटना घडल्याने परिसरात एकच खळबळ उडाली. काही क्षणांतच व्हॅनमधून धुराचे मोठे लोट बाहेर पडू लागले आणि आगीने रौद्ररूप धारण केले. मात्र, व्हॅनमधील पोलीस कर्मचाऱ्यांनी वेळीच परिस्थितीचे गांभीर्य ओळखून सर्वांना सुरक्षित बाहेर काढल्याने मोठा अनर्थ टळला. या घटनेत कोणालाही दुखापत झाली नसली तरी पोलीस व्हॅन पूर्णपणे जळून खाक झाली.
मिळालेल्या माहितीनुसार, कराड तालुक्यातील रेठरे येथे झालेल्या मारामारीच्या गुन्ह्यातील संशयित आरोपींना पोलिसांनी ताब्यात घेतले होते. या आरोपींना पुढील कायदेशीर प्रक्रियेसाठी कराड न्यायालयात हजर करण्यात आले. न्यायालयाने आरोपींना न्यायालयीन कोठडी सुनावल्यानंतर त्यांना पोलीस व्हॅनमधून सातारा जिल्हा कारागृहात हलविण्यात येत होते. यासाठी पोलीस कर्मचारी आरोपींसह कराडहून साताऱ्याच्या दिशेने निघाले होते.
दरम्यान, ही पोलीस व्हॅन कराड शहरातील भेदा चौक परिसरात पोहोचली असताना अचानक वाहनातून धूर येऊ लागला. काही वेळातच धुराचे प्रमाण वाढले आणि व्हॅनला आग लागल्याचे पोलिसांच्या लक्षात आले. भर चौकात अचानक घडलेल्या या प्रकारामुळे वाहनचालक आणि नागरिकांमध्ये घबराट पसरली. व्हॅनमधून आगीच्या ज्वाळा बाहेर पडू लागल्याने परिस्थिती अधिक गंभीर बनली.
व्हॅनला आग लागल्याचे लक्षात येताच पोलीस अंमलदार शहाजी चव्हाण यांनी प्रसंगावधान राखले. त्यांनी तातडीने व्हॅन मोकळ्या जागेत उभी केली. त्यानंतर वाहनातील पोलीस कर्मचारी आणि न्यायालयीन कोठडीतील सर्व संशयित आरोपींना सुरक्षितपणे खाली उतरवण्यात आले. वाहनातून सर्वजण बाहेर पडल्यानंतर काही वेळातच आगीने मोठे स्वरूप धारण केले. त्यामुळे काही क्षणांतच संपूर्ण पोलीस व्हॅन आगीच्या विळख्यात सापडली.
घटनेची माहिती मिळताच कराड नगरपालिकेच्या अग्निशमन दलाला पाचारण करण्यात आले. अग्निशमन दलाचा बंब घटनास्थळी दाखल झाला आणि आग विझवण्याचे प्रयत्न करण्यात आले. मात्र, तोपर्यंत आगीने वाहनाचे मोठे नुकसान झाले होते. व्हॅन पूर्णपणे जळून खाक झाली. सुदैवाने या घटनेत कोणताही पोलीस अधिकारी, कर्मचारी किंवा आरोपी जखमी झाला नाही.
