धरणगाव : प्रतिनिधी
तालुक्यातील दहिदुले येथील विवाहित महिलेने आज सकाळी विषारी पदार्थ प्राशन करुन आत्महत्या केली. या प्रकरणी सासरच्या मंडळीविरोधात आत्महत्येस प्रवृत्त केल्याप्रकरणी गुन्हा दाखल करण्यात आला आहे. तालुक्यातील दहिदुले येथील विवाहित महिला ललिताबाई पांडुरंग पाटील (वय ४१) यांनी ३० ऑक्टोबरला सकाळी १० वाजता राहत्या घरात काहितरी विषारी पदार्थ प्राशन करून आत्महत्या केली.
दरम्यान, आत्महत्येस प्रवृत्त केल्याप्रकरणी मयत विवाहितेचे पती, सासु, सासरे, दोन नणंद यांच्याविरोधात धरणगाव पोलीस ठाण्यात गुन्हा दाखल करण्यात आला आहे. दरम्यान ललिताबाई पाटील यांचे पती, सासरे व सासू हे शेतातील गाळ विक्रीचे पैसे त्यांच्या दोन्ही मुलींना देत असल्याचा आरोप करण्यात आला आहे. तर, ललिताबाई या पैशांबाबत विचारणा करत असल्याने त्यांना शिवीगाळ, उपाशी ठेवणे, मारहाण करणे असा छळ केला जात होता. या छळला कंटाळूनच ललिताबाई पाटील यांनी आत्महत्या केल्याचा दावा मयत विवाहितेचे बंधू जगदीश पंढरीनाथ पाटील (रा. वटार) यांनी करत ललिताबाईंचे पती पांडुरंग पंढरीनाथ पाटील, सासरे पंढरीनाथ तुकाराम पाटील, सासू विमलबाई पंढरीनाथ पाटील, नणंद मंगलाबाई आधार पाटील व सुरेखाबाई दीपक पाटील यांच्याविरोधात गुन्हा दाखल केला.
