बोदवडः प्रतिनिधी
तालुक्यातील मनुर बुद्रुक येथील अल्पभूधारक शेतकरी रमेश पंढरी बाठे (वय ६०) यांचे उपचार सुरू असतांना जिल्हा रुग्णालयात निधन झाले. सततची नापिकी आणि कर्जबाजारीपणामुळे ते सतत मानसिक तणावात रहात असल्याने त्यांनी आत्महत्या केल्याचे कुटुंबीयांनी सांगितले.
मिळालेल्या माहितीनुसार, मनुर खुर्द शिवारातील शेतामध्ये रविवार ७ जून २०२६ रोजी सकाळी कपाशी लागवड करण्यास गेले होते. मात्र, दुपारपर्यंत शेतातून घरी न आल्यामुळे मुलगा त्यांना शेतामध्ये बघण्यासाठी गेला असता अर्धवट बेशुद्ध अवस्थेमध्ये कडूनिंबाच्या झाडाखाली आढळून आले. मुलाने त्यांना काय झाल असे विचारले असता त्यांनी विषारी औषधे घेतल्याचे सांगितले त्यानंतर त्यांना खाजगी वाहनाने बोदवड ग्रामीण रुग्णालयमध्ये नेण्यात आले. त्यांच्या प्राथमिक उपचार करून सरकारी रुग्णवाहिकेने त्यांना जिल्हा रुग्णालयमध्ये संध्याकाळी सहा वाजता दाखल करण्यात आले.
त्यांच्यावर जिल्हा रुग्णालयामध्ये उपचार सुरू असताना दि. १० रोजी सकाळी ७ वा त्यांची प्राणज्योत मानवली. सततची नापिकी त्यामुळे विकास सोसायटीचे, बचत गटाचे कर्ज, कृषी केंद्र यांची भरपाई करण्यासाठी नातलगांकडून घेतलेल्या पैशाची खाजगी उधारी याची परतफेड होत नसल्याने ते सतत मानसिक तणावात रहात होते, असे कुटुंबीयांनी सांगितले. याप्रकरणी अकस्मात मृत्यूची नोंद जळगाव येथे जिल्हा पेठपोलीस ठाण्यात दाखल झालेली असून, शून्य क्रमांकाने बोदवड पोलीस ठाण्यात पाठवण्यात येणार आहे.
