जळगाव : प्रतिनिधी
घरासमोर लघुशंका केल्याच्या कारणावरुन झालेल्या भांडणातून राहुल संतोष वाघोदे (वय २०, रा. रामेश्वर कॉलनी) या तरुणाच्या छातीत चॉपर भोसकून खून केल्याची घटना घडली होती. घटनेच्या दिवसापासून खून करणारे तरुण-तरुणी हे दोघ पसार झाले होते. तांत्रिक विश्लेषणाच्या आधारावर तपासचक्रे फिरवित तालुका पोलीस ठाण्यातील गुन्हे शोध पथकाने संशयित सुमित जितेंद्र लोखडे (वय, रा. वाघनगर) याच्यासह सोळा वर्षीय विधीसंघर्षीत मुलीला मध्यप्रदेशातून अटक केली.
मिळालेल्या माहितीनुसार, शहरातील कोल्हे हिल्स परिसरात मद्यपान केल्यानंतर राहुल वाघोदे हा त्याचा मित्र नितीन सैनी व संशयित मारेकऱ्यांनी सोबत लोखंडी घरी जेवण केले. मद्याच्या नशेत तर्रर्रर्र असलेल्या राहुलने वाघोदे याच्या घरासमोर लघुशंका करीत होता. यावेळी सुमितच्या घरात राहत असलेली त्याची अल्पवयीन मैत्रीणने त्याला हटकून शिवीगाळ करण्यास सुरुवात केली. त्यानंतर सुमितने देखील राहुला चापटा-बुक्क्यांनी मारहाण केली. यावेळी राहुलचे मित्र हर्षल आणि नितीन हे भांडण सोडवित असतांना घरातून धारदार चॉपर घेवून आलेल्या अल्पवयीन मुलीने राहुलच्या छातीत चॉपर भोसकला. दरम्यान, तो चॉपर छातीतच अडकून पडल्यानंतर गंभीर जखमी झालेल्या राहुलला त्याच्या मित्रांनी जिल्हा रुग्णालयात दाखल केले. गंभीर जखमी असलेल्या राहुल वाघोदे याची प्रकृती चिंताजनक असल्यामुळे त्याला पुढील उपचारासाठी छत्रपती संभाजीनगर येथे हलविण्यात आले होते. त्या ठिकाणी उपचार सुरु असताना दि. ३ जून रोजी त्याचा दुर्देवी मृत्यू झाला. त्यानंतर याप्रकरणी तालुका पोलीस ठाण्यात दाखल असलेल्या गुन्ह्यात खूनाचे कलम वाढविण्यात आले होते.
घटनेचे गांभीर्य लक्षात घेत पोलीस अधीक्षक श्रीकांत धिवरे यांनी तालुका पोलीसांसह गुन्हे शोध पथकाने या गुन्ह्याचा समांतर तपास करण्याच्या सूचना दिल्या. त्यानुसार गुन्हा घडल्यापासून फरार असलेल्या लोखंडेसह त्याच्या अल्पवयीन मैत्रणीचा कसून शोध घेतला जात होता. त्यांच्या शोधार्थ तालुका पोलीस निरीक्षक शशिकांत पाटील यांनी दोन वेगवेगळी पथके मध्यप्रदेशात रवाना करण्यात आली होती. या पथकाने मध्यप्रदेशात तळ ठोकून होते.
तांत्रिक विश्लेषणाच्या आधारावर संशयितांचा शोध सुरु असतांना दोघ संशयित हे मध्यप्रदेशात वेगवेगळ्या ठिकाणी असल्याचे पोलिसांना समजले. त्यानुसार गुन्हे शोध पथकातील पोहेकॉ कैलास इंगळे, अविनाश देवरे, प्रशांत ठाकूर, योगेश पाटील व महिला अंमलदार योगिता पाचपांडे यांचे पथकाने अल्पवयीन मुलीला मध्यप्रदेशातील बऱ्हाणपुर येथून तर संशयित सुमित लोखंडी याला सुरत जिल्ह्यातील उधना येथून ताब्यात घेतले. मुलीची आशादीप सुधारगृहात रवानगी करण्यात आली आहे तर संशयित लोखंडे याला अटक करुन सोमवारी न्यायालयात हजर केले जाणार आहे.
