अमळनेर : प्रतिनिधी
शहरात येणाऱ्या गांजाला बऱ्याच प्रमाणात प्रतिबंध घातला असला तरी अनेक तरुण गांजा सेवन करून उद्ध्वस्त होत असल्याच्या तक्रारी प्राप्त झाल्याने स्थानिक गुन्हा अन्वेषण विभागाचे राहुल गायकवाड व अमळनेरचे पो.नि. दत्तात्रय निकम यांनी संयुक्त कारवाई करत चार वेगवेगळ्या ठिकाणी गांजा सेवन करणाऱ्या तरुणांना रंगेहाथ पकडून त्यांच्यावर एनडीपीएस कायद्याने गुन्हा दाखल केला आहे.
अमळनेर शहरात तरुण गांजा सेवनाकडे वळले असून भविष्यात गुन्हेगारीकडे वळतील, त्यामुळे वेळीच त्यांना आवर घालणे गरजेचे असल्याने एलसीबी व अमळनेर पोलीस स्टेशन यांनी संयुक्त मोहीम राबवली. मिळालेल्या गोपनीय माहितीवरून एलसीबी निरीक्षक राहुल गायकवाड यांनी त्यांचे कर्मचारी प्रवीण मांडोळे, संदीप पाटील, तर अमळनेर पोलीस स्टेशनचे पो.नि. दत्तात्रय निकम यांनी पोलीस उपनिरीक्षक शरद काकळीज, हे. कॉ. मिलिंद सोनार, विनोद संदानशिव, नितीन मनोरे, उदय बोरसे, नीलेश मोरे, उज्ज्वलकुमार म्हस्के, नितीन कापडणे यांना ११ रोजी वेगवेगळ्या ठिकाणी छापे मारायला पाठवले. यात मारवड रस्त्यावर उड्डाणपुलाखाली राजेश चुडामन कोईकर (वय २१, रा. बंगाली फाईल) हा तरुण चिलीममध्ये गांजा भरून सेवन करताना आढळून आला.
दुसरीकडे इंदिरा भवनमागे मोकळ्या जागेत आदिल आबीद शेख (वय २५, रा, माळीवाडा, बहादरपूर रोड) हा देखील गांजा सेवन करताना आढळला. तिसऱ्या ठिकाणी रेल्वे स्टेशन बाहेर पाण्याच्या टाकीजवळ नीलेश महेंद्र पाटील (वय २२, रा. बंगाली फाईल) हा चिलीमद्वारे गांजा सेवन करताना आढळला. तर नईमअली अशपाक अली (वय २५, रा. गांधलीपुरा) हा तरुण इंदिरा भवनच्या मागील बाजूस गांजा सेवन करताना आढळला. या चारही तरुणांकडून चिलीम आणि गांजा जप्त करून त्यांच्यावर गुन्हादाखल करण्यात आला आहे. पोलिसांच्या या धाडसत्रामुळे गंजोड्यांमध्ये दहशतीचे वातावरण पसरले असून सामान्य नागरिकांनी समाधान व्यक्त केले आहे. दरम्यान, शेतकी संघ जीन, बसस्टँड मागे, अंबाऋषी टेकडी, चोपडा रोड उड्डाण पूल, दाजीबा नगरजवळील मैदान आदी विविध ठिकाणीही काही तरुण गांजा सेवन करत असल्याची ओरड असून त्यांच्यावरही कारवाई करावी, अशी मागणी होत आहे.
