अमळनेर : प्रतिनिधी
दुकानदारांना विविध वस्तूंचा वास देऊन त्यांना वश करून त्यांच्याकडून पैसे लुटण्याचा प्रकार करणाऱ्या चार साधूंच्या टोळीला पब्लिकने चांगलाच चोप देऊन पोलीस स्टेशनला जमा केल्यावर तेथेही ‘प्रसाद’ दिला. अमळनेरात २५ रोजी ४ ते ५ साधूंच्या वेशातील टोळी दाखल झाली.
मिळालेल्या माहितीनुसार, धुळे रोडवरील तुळजाई हॉस्पिटल परिसरातील समर्थ ट्रेडिंगचे संचालक जितेंद्र पाटील या दुकानाजवळ ४ जणांच्या साधूंच्या वेशातील टोळी आली अन् टिळा लावला. तर कशाच्या तरी सुगंधाच्या नावाखाली वा गुंगी आणणाऱ्या औषधाचा वापर करून त्यांना फसवण्याचा प्रयत्न सुरू केला. त्यांनतर साधूने बळजबरी दुकानात प्रवेश करण्याचा प्रयत्न केला. तसेच जितेंद्र पाटील यांच्या गल्ल्यात हात घातला. या प्रकारात त्यांच्याकडून ५ हजारांची रोख रक्कम तसेच इतर वस्तू हडप केल्यात. सुदैवाने लक्ष्मी प्रिंटिंगचे संचालक अतुल भदाणे आणि सनी पाटील, कार्तिक चौधरी, मेहुल चौधरी, शेषनाथ बागुल यांनी हा प्रकार पाहिला.
त्यांनी तत्काळ जवळ जाऊन दुकानदाराला सावध केले. तर साधुंना पकडताच त्यांनी घेतलेले पैसे काढून दिले. तर ही माहिती कळताच लोक जमले अन् त्यांनी संधी साधूंना चोप दिला. घटनेची माहिती तत्काळ पोलिसांना देण्यात आली. पोलिसांनी तत्काळ घटनास्थळी दाखल होऊन संबंधित बहिरूपी साधूंना ताब्यात घेतले आणि चांगलाच ‘प्रसाद’ दिला. हे चारही साधू गुजरात येथील असल्याचे समजते. दरम्यान, नागरिकांनी सतर्क राहावे, अंधश्रध्येला बळी पडू नये, तर काही लोक फसवणूक करतात, नागरिकांनी संशय आल्यास तत्काळ संपर्क साधण्याचे आवाहन पोलिसांनी केले आहे.
