मुंबई : वृत्तसंस्था
शिवसेना ठाकरे गटाचे पक्षप्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे यांच्यातील युतीबाबत गेल्या अनेक दिवसांपासून सुरू असलेल्या चर्चांना अखेर पूर्णविराम मिळणार आहे. आगामी मुंबई महानगरपालिका निवडणुकीच्या पार्श्वभूमीवर ठाकरे बंधूंच्या युतीची अधिकृत घोषणा उद्या, बुधवार दि. २४ रोजी दुपारी १२ वाजता होणार असल्याचे स्पष्ट झाले आहे.
खासदार संजय राऊत यांनी त्यांच्या अधिकृत ट्विटर (एक्स) खात्यावर राज ठाकरे आणि उद्धव ठाकरे यांचा एकत्रित फोटो शेअर करत “उद्या १२ वाजता” असे कॅप्शन दिले आहे. या ट्वीटमुळे ठाकरे बंधूंच्या युतीची घोषणा कधी होणार, याबाबतचा सस्पेन्स संपला आहे.
दरम्यान, मनसेप्रमुख राज ठाकरे आणि शिवसेना उबाठा गटाच्या वरिष्ठ नेत्यांमध्ये जागावाटपाबाबत बैठक झाली असून, दोन्ही पक्षांमध्ये सहमती झाल्याची माहिती आहे. उद्या होणाऱ्या संयुक्त घोषणेत युतीसोबतच जागावाटपाचाही खुलासा होण्याची शक्यता आहे.
याआधी पत्रकार परिषदेत बोलताना खासदार संजय राऊत यांनी, “युती झालेली असून केवळ जागावाटपाची औपचारिक घोषणा बाकी आहे. आमच्यात कोणताही विसंवाद नाही. वरळीतील डोममध्ये जेव्हा दोन भाऊ एकत्र आले, तेव्हाच युती झाली,” असे स्पष्ट केले होते.
जागावाटपाचा फॉर्म्युला जवळपास निश्चित
मुंबई महानगरपालिकेच्या एकूण २२७ प्रभागांपैकी ठाकरे गट १४५ ते १५० जागांवर निवडणूक लढवणार असल्याची माहिती आहे. महाराष्ट्र नवनिर्माण सेनेला ६५ ते ७० जागा देण्यात येणार असून, ठाकरे बंधूंसोबत युतीत असलेल्या शरद पवार गटासाठी १० ते १२ जागा सोडण्यात आल्याचेही समोर येत आहे. ठाकरे बंधूंच्या युतीच्या घोषणेमुळे मुंबईच्या राजकारणात मोठी उलथापालथ होण्याची शक्यता व्यक्त केली जात असून, उद्याच्या घोषणेकडे संपूर्ण राज्याचे लक्ष लागले आहे.
