मुंबई : वृत्तसंस्था
महायुतीमधील उपमुख्यमंत्री अजित पवार यांचे पुत्र पार्थ पवार यांच्या पुण्यातील जमीन व्यवहार प्रकरणानंतर सामाजिक कार्यकर्त्या अंजली दमानिया सातत्याने आरोप करत आहेत. यातच आज दमानिया यांनी माहिती अधिकार कार्यकर्ते विजय कुंभार यांच्यासोबत पत्रकार परिषद घेत पार्थ पवार यांच्यासह उपमुख्यमंत्री अजित पवार यांच्यावर देखील निशाणा साधला.
पुण्यातील जमीन घोटाळा प्रकरणात पार्थ पवार यांच्यावरही गुन्हा दाखल झाला पाहिजे. पण राजकीय दबावामुळे त्यांच्यावर गुन्हा दाखल केला जात नाही. यापूर्वी पार्थ पवारांच्या सहीचे पत्र दिले होते. पण तेव्हा त्यांनी सांगितलं की ते माझ्या सहीचे पत्र नाही. गेल्या 5-6 वर्षापासून हा घोटाळा सुरू आहे. अजित पवारांना हे सर्व माहीत होतं आणि राज्यातले मुख्यमंत्री आणि महसूल मंत्री या प्रकरणात प्रोटेक्ट करत असल्याचा दावा माहिती अधिकार कार्यकर्ते विजय कुंभार यांनी केला आहे.
“शीतल तेजवानी आणि पार्थ पवार यांच्यात झालेला हा व्यवहार आहे. अजित पवारांचे 3 अधिकारी सामील आहेत. ढाकणे, राम चौबे, संतोष हिंगणे, विकास पाटील यांच्याशी चॅटिंग असल्याचे समोर आलं आहे, पण फक्त दिग्विजय पाटील आणि शीतल तेजवानी यांना अडकवलं जातंय आणि पार्थ पवार यांच्यावर काहीही कारवाई नाही म्हणून बहुतेक ॲडव्होकेट तृप्ता ठाकूर यांनी हे आम्हाला पाठवलं. आम्ही जी याचिका दाखल करणार आहोत त्याला पहिले जबाबदार गृहमंत्री देवेंद्र फडणवीस हे असतील. अजित पवार संत नाहीत, ते असे म्हणतीलच की माहित नाही,” असे पार्थ पवार यांच्या ‘अमेडिया’ कंपनीच्या कोरेगाव पार्क येथील 40 एकर जमीन विक्री प्रकरणात सामाजिक कार्यकर्त्या अंजली दमानियांनी केला आहे.
“पावर ऑफ अटॉर्नीमध्ये मुंढव्याची जागा असून यात प्रत्येक पेजवर पार्थ पवारांची सही आणि त्यांचा फोटो देखील आहे. 2021मध्ये याच जमिनींची पावर ऑफ अटॉर्नी आहे. ॲडव्होकेट तृप्ता ठाकूर यांनी हे पाठवलं आहे. तसेच दिग्विजय सिंह आणि शीतल तेजवानी यांच्या वकिलांनी ही पाठवलं आहे. तिने यात सर्व पाठवलं आहे, यात चाट देखील आहेत. अजित पवारांचे पीए आणि तृप्ता ठाकूर यांचे चॅटिंग यात आहे. हे सर्व पोलिसांसमोर गेले आहे. तरी पार्थ पवारांवर गुन्हा दाखल नाही. जर आज अजित पवार यांचा राजीनामा घेतला नाही तर आम्ही उद्या पुण्याला जाऊन त्यांचे नाव टाकण्याचा इशारा देणार आहोत”, असा आक्रमक पवित्रा सामाजिक कार्यकर्त्या अंजली दमानियांनी यावेळी घेतला आहे. दरम्यान, सरकारी जमीन हडपल्याच्या आरोपावरून शीतल तेजवानी, पार्थ पवार यांच्या अमेडिया कंपनीचे भागीदार दिग्विजय पाटील आणि इतर संबंधितांविरोधात पोलीस ठाण्यात गुन्हे दाखल करण्यात आले आहेत.
