जळगाव प्रतिनिधी । जिल्हाधिकारी कार्यालयातील जिल्हा नियोजन भवनात समाज कल्याण विभागाच्यावतीने डॉ. बाबासाहेब आंबेडकर यांच्या जयंतीनिमित्त विविध योजनांच्या लाभार्थ्यांचे सत्कार सोहळा घेण्यात आला.
कार्यक्रमाच्या सुरूवातील जिल्हाधिकारी अभिजित राऊत यांच्याहस्ते द्विपप्रज्वलन करून कार्यक्रमाची सुरूवात करण्यात आली. या कार्यक्रमात समाज कल्याण विभागाच्या विविध योजनेच्या लाभार्थ्यांना प्रमाणपत्र देण्यात आले. कार्यक्रमास महाविद्यालयीन विद्यार्थी मोठया प्रमाणात उपस्थित होते. विद्यार्थ्यांनी जीवनात यशस्वी होण्यासाठी डॉ. बाबासाहेब आंबेडकरांनी सांगितलेल्या विचारांचा व जीवनमुल्यांचा अंगीकार करावा असे प्रतिपादन जिल्हाधिकारी अभिजित राऊत यांनी केले.
कार्यक्रमाचे प्रास्ताविक समाज कल्याण विभागाचे सहाय्यक आयुक्त योगेश पाटील यांनी केले. राकेश पाटील, उपायुक्त, जिल्हा जात प्रमाणपत्र पडताळणी समिती यांनी वैधता प्रमाणपत्र समितीच्या कामकाजाच्या बदलेल्या स्वरुपाबददल माहिती दिली. तृतीयपंथीय कल्याण व हक्क समितीच्या नाशिक विभागीय सदस्या प्रा. शमिबा पाटील यांनी बाबासाहेबांच्या कार्याबाबत विचार व्यक्त करुन तृतीयपंथीयांना त्यांचे हक्क मिळण्यासाठी सर्व समाज घटकांकडून सहकार्यांची अपेक्षा व्यक्त केली. प्रा. संजीव सोनवणे यांनी डॉ. बाबासाहेब आंबेडकर यांच्या जीवनचरित्रावर व्याख्यान दिले. मुलींचे शासकीय वसतीगृह जळगाव येथील विद्यार्थीनींनी डॉ. बाबासाहेबांच्या जीवनातील काही प्रसंग पथनाटयाव्दारे सादर केले.
या कार्यक्रमास जिल्हा महिला व बाल विकास अधिकारी डॉ. वनिता सोनगत तसेच धनाजी नाना चौधरी समाजकार्य महाविद्यालयाचे प्राचार्य डॉ. राकेश चौधरी उपस्थित होते. कार्यक्रमाचे सुत्रसंचलन विनोद ढगे यांनी तर आभार प्रदर्शन आर.डी. पवार वरिष्ठ समाज कल्याण निरीक्षक यांनी केले. कार्यक्रमाच्या यशस्वीतेसाठी समाज कल्याण विभागाचे अधिकारी व कर्मचारी यांनी परिश्रम घेतले.
