जळगाव : प्रतिनिधी
दोन महिन्यांपूर्वी लग्न झाल्यानंतर पहिल्यांदाच विवाहीता मुंबई येथे संसाराचा सामान घेऊन रेल्वेतून प्रवास करीत होत्या. वाटेतच अचानक विवाहितेची तब्येत बिघडली आणि त्यांचा उपचारापूर्वीच मृत्यू झाल्याची दुर्देवी घटना अकोला ते जळगाव रेल्वे स्टेशनदरम्यान घडली. प्रियंका अक्षय सुरोशे (वय २०, रा. ज्ञानेश्वर नगर, अकोला) असे मयत विवाहीतेचे नाव आहे. या घटनेमुळे विवाहितेच्या कुटुंबियांवर दुःखाचा डोंगर कोसळला आहे. याप्रकरणी भुसावळ रेल्वे पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, अकोला येथील अक्षय सुरोशे हे मुंबईतील एका खाजगी कंपनीत नोकरीस आहे. त्यांचे प्रियंका यांच्यासोबत दोन महिन्यांपुर्वीच विवाह झाला होता. दोन महिने सासरी राहिल्यानंतर मुंबईत स्थायिक होण्यासाठी त्या सासूसोबत निघाल्या होत्या. दि. २९ जानेवारी रोजी रात्री आठ वाजता अमरावती-मुंबई एक्सप्रेसमध्ये आपल्या सासू साधना सुरोशे यांच्यासोबत त्यांनी प्रवास सुरू केला. त्यांच्यासोबत संसाराचा सामानही होता. शेगाव स्थानकाजवळ प्रियंकाने जेवण केले. मात्र, काही वेळाने मलकापूरजवळ अचानक त्यांची तब्येत बिघडली आणि त्यांना उलट्या सुरू झाल्या, प्रकृती अधिक खालावल्याने सासू साधना सुरोसे यांनी रेल्वेतील टीसीशी संपर्क साधून तातडीने वैद्यकीय मदतीची मागणी केली.
विवाहितेची अचानक तब्येत बिघडल्यामुळे टीसीने भुसावळ येथे उपचार मिळतील असे सांगितले. मात्र, प्रियंका यांची प्रकृती अधीकच खालावत गेली. रेल्वे भुसावळ स्थानकात पोहोचताच त्यांना तातडीने उपचारासाठी हलवण्यात आले. मात्र, रात्री १२ वाजता त्यांचा दुर्दैवी मृत्यू झाला. प्रियंका यांचा मृतदेह जळगावच्या शासकीय वैद्यकीय महाविद्यालयात हलवण्यात आला. नवविवाहितेचया मृत्यूची बातमी कळताच माहेरच्या मंडळींनी रुग्णालयात धाव घेतली आणि एकच हंबरडा फोडीत आक्रोश केला. त्यांच्या पश्चात पती अक्षय सुरोसे, सासू, आई-वडील, भाऊ, दोन बहिणी असा परिवार आहे. या घटनेची भुसावळ रेल्वे पोलीस ठाण्यात अकस्मात मृत्यू म्हणून नोंद करण्यात आली आहे. पुढील तपास रेल्वे पोलीस कर्मचारी नंदू खरडे करीत आहेत.
