जळगाव : प्रतिनिधी
भरधाव कारने पादचारी महिला व दुचाकीस्वाराला जबर धडक दिली. त्यानंतर ही कारहीदेखील रस्त्याच्या कडेला उलटली. यामध्ये महिला व दुचाकीस्वारासह कारमधील दोघे असे एकूण चार जण जखमी झाले. ही घटना रविवारी रात्री म्हसावद ते विटनेर दरम्यान घडली. संबंधित कारचालकाने एकाला कट मारला होता, त्यामुळे पाठलाग करणाऱ्यापासून बचाव करण्याच्या प्रयत्नात असतानाच त्याने पादचारी महिलेसह दुचाकीला धडक दिल्याचे समजते.
मिळालेल्या माहितीनुसार, म्हसावदकडून नेरीकडे जाणाऱ्या कारने (क्र. एमएच १५, सीडी ८१९४) एकाला कट मारला होता; त्यानंतर कुणी पाठलाग करेल या भीतीने कारचालकाने आपली कार दामटली. ही कार भरधाव वेगाने वावडद्याकडे निघाली असता या ठिकाणी सुनबाई भिका राजपूत ही महिला रस्ता ओलांडत असताना कारने त्यांना जोरदार धडक दिली. त्यात त्या उंच फेकल्या गेल्या.
महिलेला उडविल्यानंतर गावकऱ्यांनी या कारला अडविण्याचा प्रयत्न केला मात्र कारचालक न थांबता भरधाव निघून गेला. त्यामुळे गावकऱ्यांनी विटनेर येथील ग्रामस्थांना माहिती दिली. तेथे रस्त्यावर बैलगाडी आडवी लावून कारला थांबविण्याचा प्रयत्न केला असता कारचालक वळून मागे आला व पुन्हा वावडद्यानजीक पप्पू कदम राठोड (रा. रामदेव वाडी) या दुचाकीस्वाराला जोरदार धडक दिली. त्यानंतर ही कार रस्त्याच्या कडेला जाऊन उलटली. कारचालकाला अडविण्यासाठी वावडदा गावातील ५० ते ६० जण रस्त्यावर थांबले होते; मात्र तरीदेखील कारचालकाने न जुमानता कार भरधाव वेगाने नेली. कार रस्त्याच्या कडेला उलटल्यानंतर याच नागरिकांनी कारमधील दोघांना बाहेर काढून रुग्णालयात हलविले, जखमींची नावे कळू शकलेली नाहीत.
