चाळीसगाव : प्रतिनिधी
चाळीसगाव तालुक्यातील एका गावातील अल्पवयीन मुलीला त्याच गावातील अल्पवयीन मुलाने पळवून नेत अत्याचार केला होता. शिवाय मोबाइल मधील फोटो व्हायरल करण्याची धमकी देत अत्याचार केला होता. पोलिसांनी तपासात ज्या ठिकाणी पीडितेवर अत्याचार करण्यात आला, त्या खोलीच्या महिला मालकांचा शोध घेत त्यांना या गुन्ह्यात आरोपी केले असून त्यांना अटक केली आहे. संशयित महिला अल्पवयीन मुलांना शरीरसंबंधासाठी पाचशे रुपये घेऊन खोली उपलब्ध करून देत असल्याने त्यांना आरोपी करण्यात आले आहे. या कारवाईने शहरात मोठी खळबळ उडाली आहे. शीतल ज्ञानेश्वर राठोड (५१) व लताबाई दीपक पाटील (४५, दोन्ही मालेगावरोड, चाळीसगाव) अशी अटकेतील महिलांची नावे आहेत.
पोलिस सूत्रांनी दिलेली माहिती अशी की, चाळीसगाव तालुक्यातील एका गावातील अल्पवयीन मुलीने गावातील अल्पवयीन मुलाविरोधात १८ जुलै रोजी अत्याचार केल्याची तक्रार दिली होती. सुरुवातीला पाटणा देवीला जायचे असल्याचे सांगून नंतर आत्महत्या करण्याची व त्यात तिच्या घरच्या लोकांना फसविण्याची धमकी देऊन तिच्यावर रामकृष्ण नगर, मालेगावरोड, चाळीसगाव येथे अत्याचार केला होता. दोन महिलांना पाचशे रुपये दिल्यानंतर या महिलांनी अल्पवयीन मुलास खोली उपलब्ध करून दिल्याचे तपासात निष्पन्न झाल्यानंतर या महिलांना या गुन्ह्यात आरोपी करण्यात आले. अल्पवयीन मुलीस विश्वासात घेतल्यानंतर तिने सर्व आपबीती सांगितल्यानंतर पोस्कोसह विविध कलमान्वये गुन्हा दाखल करण्यात आला. विधी संघर्ष ग्रस्त बालकासह बाल न्यायमंडळ, जळगावकडे हजर करण्यात आले तर अल्पवयीन मुलीसोबत शरीर संबंध ठेवण्यासाठी घरातील एक खोली उपलब्ध करून देणाऱ्या दोघा महिलांविरोधात गुन्हा दाखल करून त्यांना अटक करण्यात आली आहे. न्यायालयाने त्यांची जिल्हा कारागृहात रवानगी केली. तपास पोलिस उपनिरीक्षक कुणाल चव्हाण करीत आहेत.
