जळगाव : प्रतिनिधी
तुम्ही विहरीचे ठिकाणी बदल केले असून तुम्हाला पैसे मिळणार नाही. जर तुम्हाला विहरीचे पुढील अनुदान पाहिजे असतील तर तुम्हाला मला ३० हजार द्यावे लागतील. असे म्हणत ३० हजारांच्या लाचेची मागणी करणाऱ्या जामनेर पंचायत समिती कार्यालयातील तांत्रिक सहाय्यक कंत्राटी कर्मचारी सागर अशोक नावकर (वय ३२, रा. गणपतीनगर, तळेगाव, ता. जामनेर) याला लाचलुचपत प्रतिबंधक विभागाने पकडले. याप्रकरणी जामनेर पोलीसात गुन्हा दाखल करण्यात आला आहे.
तक्रारदार यांची जामनेर शिवारात शेती असून सन २०२१-२२ व २०२२-२३ या वर्षात पंचायत समिती यांच्याकडून प्रस्तावित सिंचन विहीर मंजूर झाली होती. पंचायत समितीचे कंत्राटी तांत्रिक सहाय्यक सागर नावकर यांनी प्रस्तावित विहिरीची स्थळ पाहणी करण्यापुर्वीच तक्रारदार यांच्याकडून गावातील रोजगार सेवक यांच्या मार्फत ३० हजार रुपये स्विकारुन स्थळ पाहणी करुन फोटो काढून नेले होते. त्यानंतर तक्रारदार यांना पंचायत समिती यांच्याकडून वेळोवेळी ६० हजार ९६६ रुपये मिळाले होते. उर्वरीत रक्कम मिळण्याकरीता तक्रादार यांनी सागर नावकर यांची भेट घेवून ३० हजार रुपयांच्या लाचेची मागणी केली होती.
लाचेची मागणी झाल्यानंतर तक्रादार यांनी दि. ६ जून एप्रिल रोजी लाचलुचपत प्रतिबंधक विभागाकडे तक्रार दिली होती. त्या तक्रारीच्या अनुषंगाने दि. ८ एप्रिल व दि. १४ मे रोजी झालेल्या पडताळणीमध्ये तांत्रीक सहाय्यक यांनी दि. ६ एप्रिल रोजी लाच मागितल्याचे स्पष्ट झाले. त्यानुसार जामनेर पोलीसात गुन्हा दाखल करण्यात आला आहे.
