मुंबई : वृत्तसंस्था
महाराष्ट्रात सध्या चर्चेत असलेल्या कथित भोंदू अशोक खरात प्रकरणावरून राजकीय वातावरण तापले असून, या प्रकरणात आता सुषमा अंधारे यांनी राज्य सरकारवर जोरदार हल्लाबोल केला आहे. विशेषतः महिला व बालविकास मंत्री अदिती तटकरे यांच्यावर त्यांनी कठोर टीका केली आहे.
या प्रकरणात रूपाली चाकणकर यांच्या भगिनी प्रतिभा चाकणकर यांनी नुकतीच शिर्डी पोलीस ठाण्यात हजेरी लावली होती. मात्र बाहेर आल्यानंतर त्यांनी आपल्याला कोणतीही नोटीस मिळाली नसल्याचे सांगितले. यावरून अंधारे यांनी अनेक प्रश्न उपस्थित करत सरकारच्या भूमिकेवर संशय व्यक्त केला आहे.
अंधारे म्हणाल्या की, “महिला नेत्या म्हणून अदिती तटकरे यांनी आधी स्वतःची भूमिका स्पष्ट करावी. केवळ पद भूषवून चालणार नाही, तर आपल्या खात्याच्या अखत्यारीत येणाऱ्या प्रकरणांमध्ये ठोस कारवाई करणे आवश्यक आहे.” त्यांनी तटकरे यांनी मुख्यमंत्री स्तरावर या प्रकरणात पाठपुरावा केला आहे का, असा थेट सवाल उपस्थित केला.
सुषमा अंधारे यांनी स्पष्टपणे सांगितले की, या प्रकरणात केवळ राजीनामा घेऊन भागणार नाही, तर संबंधितांवर अटकेची कारवाई व्हावी, अशी अपेक्षा आहे. चाकणकर यांचे संबंध अधिक स्पष्ट होत असल्याचा दावा करत त्यांनी तपास यंत्रणांच्या भूमिकेवरही प्रश्नचिन्ह उपस्थित केले. प्रतिभा चाकणकर यांनी त्यांच्या खात्यांमध्ये बनावट कागदपत्रांचा वापर झाल्याचा दावा केल्याने अंधारे यांनी यावरही शंका व्यक्त केली. “केवायसी प्रक्रियेदरम्यान ओटीपी कोणाच्या मोबाईलवर गेला? जर त्यांना काहीच माहिती नव्हती, तर त्यांना बळीचा बकरा बनवले जात आहे का?” असा सवाल त्यांनी उपस्थित केला.
अंधारे यांनी प्रतिभा चाकणकर यांच्या वक्तव्यावरूनही टीका करत विचारले की, “जर नोटीसच आली नव्हती, तर त्या पोलीस ठाण्यात का गेल्या?” यामुळे संपूर्ण प्रकरणात काहीतरी दडपले जात असल्याचा संशय अधिक गडद होत असल्याचे त्यांनी म्हटले.
या प्रकरणात एका अल्पवयीन मुलीचाही अप्रत्यक्ष उल्लेख होत असल्याने, अंधारे यांनी महिला व बालकल्याण विभागाच्या भूमिकेवर प्रश्न उपस्थित केले. “महिलांच्या प्रश्नांवर बोलणारे मंत्री अशा संवेदनशील प्रकरणात शांत का?” असा सवाल करत त्यांनी सरकारवर दबाव वाढवला आहे. दरम्यान, या प्रकरणाचा तपास सुरू असून येत्या काही दिवसांत आणखी महत्त्वाचे खुलासे होण्याची शक्यता व्यक्त केली जात आहे. या घडामोडींमुळे राज्यातील राजकीय वातावरण आणखी तापण्याची चिन्हे दिसत आहेत.
