जळगाव : प्रतिनिधी
मध्य प्रदेशातून महाराष्ट्र राज्यात मोठ्या प्रमाणात अवैध गुटखा वाहतूक होत असून मुक्ताईनगर पोलिसांनी २६ रोजी रात्री कारवाई करुन जवळपास अडीच लाखांचा गुटखा पडकला आहे.
जिल्हा पोलीस अधीक्षक डॉ. महेश्वर रेड्डी यांनी जिल्ह्यात अवैधरित्या गुटख्याचा साठा व अवैधरित्या होणारी वाहतूक पुर्णतः थांबवण्याबाबत आदेश दिलेले आहेत. त्या अनुषंगाने २६ मार्चला रात्री ९ वाजेच्या सुमारास मुक्ताईनगर तालुक्यातील पुर्णाड फाटा ते सुकळी गावादरम्यान राशा बर्डाजवळ अनिकेत शिवाजी सुरवसे (वय ३५, रा. सावरगांव पोस्ट नारी, ता. बार्शी, जि. सोलापुर) हा एका वाहनातून २ लाख ४३ हजार ३६० रुपयांचा केसरयुक्त विमल पानमसाला व व्ही-१ तंबाखूचा गुटखा घेवून जात होता. हा गुटख्याचा साठा मुक्ताईनगर पोलिसांनी जप्त केला आहे. तसेच पोलिसांनी ४ लाखांची चारचाकी (एमएच १४, डिएक्स- १४६३) व ५ हजारांचा मोबाईल असा एकूण ६ लाख ४८ हजार ३६० रुपयांचा मुद्देमाल जप्त केला आहे.
ही कारवाई जिल्हा पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, अप्पर पोलिस अधीक्षक कविता नेरकर, डीवायएसपी अनिल बडगुजर यांच्या मार्गदर्शनात पो. नि. आशिष आडसूळ, उपनिरीक्षक नीलेश गोसावी, पो.हे.कॉ. भाऊराव घेटे, पो.ना. असिम तडवी, पो.कॉ. प्रशांत चौधरी व जवाहर पवार यांच्या पथकाने केली. या प्रकरणात अन्न सुरक्षा अधिकारी योगराज सूर्यवंशी यांच्या फिर्यादीवरून गुन्ह्याची नोंद करण्यात आली आहे. या प्रसंगी महसूल विभागाचे कर्मचारी किरण बावस्कर, कृष्णा माळी उपस्थित होते.
