विजय पाटील : राज्य उत्पादन शुल्क विभागाने अमळनेर आणि चोपडा परिसरात मोठी कारवाई करत अवैध बनावट देशी-विदेशी मद्यनिर्मिती करणाऱ्या कारखान्याचा पर्दाफाश केला. या कारवाईत दोन आरोपींना अटक करण्यात आली असून तब्बल ३ लाख १ हजार ७३५ रुपयांचा मुद्देमाल जप्त करण्यात आला आहे.
गुप्त माहितीच्या आधारे १२ फेब्रुवारी २०२६ रोजी जवखेडे-मांडळ रोडवरील एका विहिरीजवळ सापळा रचण्यात आला. अवैध मद्याची वाहतूक करताना भावलाल सुकदेव पारवे (रा. नवलनगर, धुळे) याला पकडण्यात आले. त्याच्या चौकशीनंतर अमळनेर येथील धुळे रोडवरील आर. के. नगर भागात राहणाऱ्या दिनेश प्रभाकर खंबायत याच्या घरावर रात्री २१:१० वाजता छापा टाकण्यात आला. तेव्हा तो घरातच बनावट देशी-विदेशी मद्य तयार करताना रंगेहात सापडला.
जप्त मुद्देमाल
कारवाईदरम्यान दोन हिरो-होंडा मोटारसायकली (MH 18 CG 1549, MH 15 CA 0774), मॅकडॉल नं.१ च्या ४८ बनावट सीलबंद बाटल्या, १०५ लिटर तयार देशी दारू, मोठ्या प्रमाणात रिकाम्या बाटल्या व बुच, तसेच मद्य सीलिंग मशीन, प्लास्टिक ड्रम, पाण्याचे जार, ट्रे, नळ्या आणि सुगंधी अर्क जप्त करण्यात आले.
या प्रकरणी महाराष्ट्र दारूबंदी अधिनियम अंतर्गत गुन्हा दाखल करण्यात आला आहे. जप्त साठ्यावरून आंतरराज्य मद्य तस्करांच्या मोठ्या जाळ्याचा संशय व्यक्त करण्यात येत आहे.
ही कारवाई राज्य उत्पादन शुल्क आयुक्त राजेश देशमुख, संचालक प्रसाद सुर्वे, विभागीय उप-आयुक्त उषा वर्मा आणि अधीक्षक डॉ. व्ही. टी. भुकन यांच्या मार्गदर्शनाखाली पार पडली. पुढील तपास दुय्यम निरीक्षक जी. एस. मोरे करत आहेत.
