भुसावळ : प्रतिनिधी
शहरातील एका २७ वर्षीय तरुणीला शेअर मार्केटमध्ये आर्थिक फायदा करून देण्याचे आमिष दाखवून तब्बल १० लाख रुपयांत फसवणूक केल्याचा गंभीर प्रकार उघडकीस आला आहे. लग्नासाठीही संशयिताने दबाव टाकल्याचा आरोप पीडितेने केला आहे. याबाबत संशयित सिद्धांत मनोज हेडा (रा. गंगाराम प्लॉट, भुसावळ) याला अटक केली आहे. त्याला सहा दिवसांची पोलिस कोठडी सुनावण्यात आली आहे.
पोलिसांनी दिलेल्या माहितीनुसार, संशयित सिद्धांत हेडा याने तरुणीशी असलेल्या ओळखीचा गैरफायदा घेत शेअर मार्केटमध्ये गुंतवणूक केल्यास मोठा नफा मिळेल, असे सांगून तिच्या डिमॅट अकाउंटची माहिती घेतली. त्यानंतर त्या अकाउंटमधून तसेच क्रेडिट कार्डचा वापर करून आरोपीने सुमारे १० लाख रुपये लंपास केले. आर्थिक फसवणुकीनंतर आरोपीने या तरुणीवर लग्नासाठी दबाव टाकला. तिने नकार दिल्यानंतर आरोपीने मुंबई ते मंगलोरपर्यंत प्रवासात तिचा पाठलाग करत विनयभंग केला. याप्रकरणी भुसावळ बाजारपेठ पोलिस ठाण्यात गुन्हा दाखल करण्यात आला आहे.
