जळगाव : प्रतिनिधी
ड्रग्स प्रकरणात पोलिस कोठडीत असलेला शेख अबरार शेख मुक्तार उर्फ अबरार जिलानी हा राजस्थान, गुजरातच्या सीमावर्ती भागासह मध्य प्रदेशातून एमडी ड्रग्स आणून जळगाव शहरात त्याची विक्री करत असल्याचे पोलिस तपासात उघडकीस आले आहे. त्यामुळे या प्रकरणातील ड्रग्स पुरवठादार आणि मोठ्या माफियांपर्यंत पोहोचण्यासाठी पोलिसांनी तपासाचा आवाका वाढवला आहे.
शाहू नगर परिसरात शहर पोलिसांनी छापा टाकून साडेपाच लाख रुपयांचे एमडी ड्रग्स जप्त केले होते. या प्रकरणात दहा महिन्यांपासून पसार असलेला शेख अबरार जिलानी याला २४ डिसेंबर रोजी अटक करण्यात आली असून सध्या तो पोलिस कोठडीत आहे. अटकेनंतर पोलिसांनी तपास अधिक वेगाने सुरू केला आहे.
दरम्यान, मालेगाव येथे झालेल्या कारवाईत अबरार जिलानीसह अरबाज खान मेहमूद खान उर्फ गबा (रा. मास्टर कॉलनी) हा पसार झाला होता. मात्र मालेगाव पोलिसांनी त्याला अटक केली असून, जळगाव पोलिसांकडून ड्रग्स प्रकरणातील चौकशीसाठी त्याला ताब्यात घेण्यात येणार आहे.
तसेच सुरत येथे झालेल्या स्वतंत्र कारवाईत इम्रान खाटीक यालाही अटक करण्यात आली आहे. त्यालादेखील पुढील चौकशीसाठी पोलिसांकडून ताब्यात घेतले जाणार आहे. चौकशीदरम्यान आरोपींनी हे ड्रग्स राजस्थान व गुजरात राज्यांच्या सीमावर्ती भागातून तसेच मध्य प्रदेशातून आणल्याची कबुली दिल्याचे पोलिसांनी सांगितले.
तपासाचे धागेदोरे तीन राज्यांपर्यंत पोहोचल्याने आता पोलिसांकडून त्या भागातील सक्रिय ड्रग्स माफिया आणि साखळीचा शोध घेतला जात असून, लवकरच आणखी मोठ्या अटकांची शक्यता वर्तवली जात आहे.
