जळगाव : प्रतिनिधी
बसमध्ये चढताना गर्दीचा फायदा घेत विद्यार्थ्यांच्या पॅन्टच्या खिशातून मोबाईल चोरणाऱ्या सराईत चोरट्याला जिल्हापेठ पोलिसांनी अटक केली आहे. हमीद आयुब खान (वय २२, रा. मास्टर कॉलनी) असे अटक करण्यात आलेल्या आरोपीचे नाव असून, त्याच्याकडून चोरी केलेले तीन महागडे मोबाईल पोलिसांनी हस्तगत केले आहेत. आरोपीविरुद्ध यापूर्वीही चोरीचे गुन्हे दाखल असल्याची माहिती समोर आली आहे.
मिळालेल्या माहितीनुसार, दि. २३ डिसेंबर रोजी सायंकाळी सुमारे पावणे सहा वाजेच्या सुमारास शहरातील नवीन बसस्थानक परिसरात बसमध्ये चढताना निखिल राजू मानके (वय २०, रा. धानवड, ता. जळगाव), मयुर मांगू पाटील (वय २०, रा. चिंचखेडा, ता. जळगाव) यांच्यासह एका विद्यार्थिनीचा मोबाईल चोरट्याने हातचालाखीने लांबवला. चोरीचा प्रकार लक्षात येताच संबंधित विद्यार्थ्यांनी तत्काळ जिल्हापेठ पोलीस ठाण्यात धाव घेऊन तक्रार दिली. त्यानुसार अज्ञात चोरट्याविरुद्ध गुन्हा दाखल करण्यात आला.
एकाच वेळी तीन मोबाईल चोरीस गेल्याने जिल्हापेठ पोलीस ठाण्याचे पोलीस निरीक्षक प्रदीप ठाकूर यांनी तातडीने तपास पथक तयार केले. महिला पोलीस हवालदार भारती देशमुख, पोलीस कॉन्स्टेबल राहुल पाटील व नरेंद्र दिवेकर यांच्या पथकाने शोधमोहीम राबवली. या दरम्यान संशयास्पदरीत्या फिरत असलेला हमीद आयुब खान पोलिसांच्या ताब्यात घेण्यात आला.
कसून चौकशीत आरोपीने चोरी केलेले तीन मोबाईल काढून दिले. पुढील तपासात तो सराईत चोरटा असून त्याच्यावर यापूर्वीही चोरीचे गुन्हे दाखल असल्याचे निष्पन्न झाले आहे. या प्रकरणी जिल्हापेठ पोलिसांकडून पुढील तपास सुरू आहे.
