सिंदखेड राजा ;- बुलडाण्यात भीषण अपघातात 13 मजुरांचा मृत्यू झाल्याची दुर्घटना घडली आहे. सिंदखेडराजा तालुक्यातील तढेगाव फाट्याजवळ टिप्पर पलटी झाल्याने 13 मजुरांचा मृत्यू झाला, तर 10 जण जखमी झाले आहेत. लोखंडी रॉड घेऊन टिप्पर मजुरांसह समृद्धी महामार्गाकडे जात असताना हा अपघात झाल्याची माहिती मिळते आहे. विरूद्ध दिशेने येणाऱ्या एका बसला जाण्यासाठी जागा करून देताना टिप्पर रस्त्याच्या कडेला पलटी झाला. या टिप्परमध्ये लोखंडी रॉड होते. या रॉडखाली 16 मजूर दाबले गेले. त्यातील 8 जणांचा घटनास्थळी तर 5 जणांचा उपचारादरम्यान मृत्यू झाला.
जखमी मजुरांवर किणगाव राजा, सिंदखेडराजा येथील ग्रामीण रुग्णालयात उपचार सुरू आहे. काही गंभीर जखमींना जालना जिल्हा रुग्णालयात उपचारासाठी पाठवण्यात आलंय.
