जळगाव : प्रतिनिधी
ऑस्ट्रेलियामध्ये राहणाऱ्या मुलीकडे दाम्पत्य गेलेले असताना त्यांच्या बंद घराच्या दरवाजाचा कडीकोयंडा तोडून चोरट्यांनी चार तोळ्यांचे दागिने चोरून नेल्याची घटना १५ मे ते १ जूनदरम्यान पिंप्राळा परिसरातील मारुती पार्क परिसरात घडली. याप्रकरणी रामानंदनगर पोलिस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
सविस्तर वृत्त असे कि, सेवानिवृत्त असलेले नरेंद्र दौलतराव वाघ व त्यांच्या पत्नी १५ मे रोजी ऑस्ट्रेलियामध्ये राहणाऱ्या मुलीकडे गेले. त्यावेळी चोरट्यांनी कपाटातून ३० ग्रॅमची सोन्याची चेन व १० ग्रॅमच्या सोन्याच्या दोन अंगठ्या, असा एकूण एक लाख २५ हजार रुपयांचा ऐवज चोरून नेला चोरट्यांनी घरातील सीसीटीव्हीचा डीव्हीआर काढून नेला आहे. त्यामुळे फुटेज मिळण्यास अडचणी येत आहेत. घटनास्थळी रामानंदनगर पोलिसांसह फॉरेन्सिक टीम, श्वान पथक व ठसे तज्ज्ञांनीही पाहणी केली. श्वानाने काही अंतरापर्यंत माग काढला. तर चोरट्यांनी हँड ग्लोज वापरल्याची शक्यता असून, त्यामुळे ठसेही मिळत नसल्याचे सांगण्यात आले.
वाघ यांच्या घरातील सीसीटीव्ही बंद पडल्याचे त्यांना मोबाइलवरील अॅक्सेसमुळे समजले. त्यांनी त्यांचे साडू लीलाधर शांताराम खंबायत यांना घरी जाऊन पाहण्यास सांगितले. १ जून रोजी खंबायत हे तेथे गेले असता त्यांना दरवाजाचा कडीकोयंडा तुटलेला दिसला. याप्रकरणी लीलाधर खंबायत यांनी रामानंदनगर पोलिस ठाण्यात फिर्याद दिली. त्यावरून अज्ञात चोरट्याविरुद्ध गुन्हा दाखल करण्यात आला आहे. पुढील तपास सपोनि संदीप वाघ करीत आहेत.
