जळगाव : प्रतिनिधी
शहरातील नागेश्वर कॉलनी परिसरात अंगणात खेळत असलेल्या अरविंद सचिन गायकवाड (४ वर्षे) या बालकावर मोकाट कुत्र्याने हल्ला करीत, त्याच्या चेहरा, मान, गळ्याचे अक्षरशः लचके तोडले. यात या बालकाचा मृत्यू झाला. ही घटना रविवारी नागेश्वर कॉलनीत घडली, याशिवाय अन्य चार ते पाच जणांनाही कुत्र्याने चावा घेतला. दरम्यान, या घटनेनंतर नातेवाईक आणि परिसरातील नागरिकांनी रुग्णालयात महापालिकेच्या कारभारावर रोष व्यक्त केला. मजुरी काम करणारे सचिन गायकवाड यांचा मुलगा अरविंद हा रविवारी संध्याकाळी अंगणात खेळत होता. त्यावेळी अचानक कुत्र्याने या बालकावर हल्ला केला. मानेवर व गळ्यावर जोरदार चावा घेतल्याने खोलवर जखमा झाल्या आहेत. या बालकाला शासकीय रुग्णालयात दाखल केले असता डॉक्टरांनी मयत घोषित केले.
शहरात मोकाट भटकणाऱ्या व नागरिकांवर जीवघेणा हल्ला करणाऱ्या कुत्र्यामुळे भीतीचे वातावरण पसरले आहे. सकाळी शाळेत व क्लासला जाणारे मुले, मॉर्निंग वॉक करणारे नागरिक, रात्री उशिरा कामावरून घरी परतणारे कर्मचारी कामगारांवर ही मोकाट कुत्रे हल्ले करतात. शहरात अनेक भागातून जाणे आता धोक्याचे झाले आहे. शहरात मोकाट कुत्र्यांची संख्या दिवसेंदिवस वाढत आहे. महापालिकेने निर्बिजीकरण व भटक्या कुत्र्याच्या बंदोबस्त करावा, अशी मागणी होत आहे
