भुसावळ : प्रतिनिधी
शहरातील शिवाजी नगरात घर खाली करण्याच्या कारणावरून दोन कुटुंबात हाणामारी होवून एकमेकांना शिवीगाळ करत ठार मारण्याची धमकी दिल्याचा धक्कादायक प्रकार १८ रोजी सकाळी ९.३० वाजता घडला. याप्रकरणी भुसावळ बाजारपेठ पोलीस ठाण्यात परस्परविरोधात एकुण ९ जणांविरोधात वेगवेगळे गुन्हे दाखल करण्यात आले आहेत.
मिळालेल्या माहितीनुसार, भुसावळातील शिवाजी नगरात अनिल हरगोविंद सिंधवाणी (वय ६०) आणि प्रविण अशोक अग्रवाल (वय ३४) असे दोन कुटुंबिय वास्तव्याला आहेत. दोघांच्या परिवारात १८ जानेवारीला सकाळी ९.३० वाजेच्या सुमारास घर खाली करण्यावरून वाद झाला. यात पहिल्या कुटुंबातील अनिल सिंधवाणी यांच्यासह शृती हरगोविंद्र सिंधवाणी आणि क्रीश अनिल सिंधवाणी यांना मारहाण करून जखमी करत त्यांच्या घरातून ३ लाख ४० हजारांचे सोन्याचे दागिने आणि रोकड चोरून नेल्याचे सांगण्यात आले.
तर दुसऱ्या परिसरातील प्रविण अग्रवाल यांच्यासह अशोक अग्रवाल, शोभा अग्रवाल, आरती अग्रवाल, कैलास अग्रवाल आणि सोनी अग्रवाल (सर्व रा. शिवाजी नगर) यांना चापटाबुक्क्यांनी बेदम मारहाण करून घराचे कुलूप तोडून घरातून सोन्याचे मंगळसुत्र आणि रोकड असा एकुण २ लाख ४० हजारांचा मुद्देमाल जबरी चोरून नेल्याचे फिर्यादीत नमूद केले आहे. याप्रकरणी भुसावळ बाजारपेठ पोलीस ठाण्यात पहिल्या कुटुंबातील अनिल सिंधवाणी यांच्यासह शृती हरगोविंद्र सिंधवाणी आणि क्रीश अनिल सिंधवाणी तर दुसऱ्या कुटुंबातील प्रविण अग्रवाल यांच्यासह अशोक अग्रवाल, शोभा अग्रवाल, आरती अग्रवाल, कैलास अग्रवाल आणि सोनी अग्रवाल अशा एकुण ९ जणांविरोधात गुन्हा दाखल करण्यात आला आहे. तपास पोलीस उपनिरीक्षक राजू सांगळे करत आहेत.
